हिंगोली येथील एनटीसीमध्ये पोलिसांच्या छाप्यात तीन लाख ५० हजाराचा गुटखा जप्त

हिंगोली : शहरातील एनटीसी भागात पोलिसांच्या पथकाने शुक्रवारी ता. ३१टाकलेल्या छाप्यात तीन लाख पन्नास हजाराचा गुटखा व एक वाहन असा पाच लाखांचा ऐवज जप्त केला आहे. पोलिसांनी दिलेल्या माहितीनुसार शहरातील एनटीसी भागात एका घरामध्ये वाहनातून आणलेला गुटखा उतरविला जात असल्याची माहिती पोलिसांना मिळाली होती. त्यावरून पोलिस अधिक्षक राकेश कलासागर यांच्या मार्गदर्शनाखाली सहाय्यक पोलिस अधिक्षक यतीश देशमुख जमादार भगवान मंडलीक, संतोष बंडे यांच्या पथकाने सकाळी येथे छापा टाकला असता यात एका वाहनातून रजनीगंधा व इतर गुटख्याचज पोते आनंद अग्रवाल याच्या घरात उतरविली जात असल्याचे निदर्शनास आले.(Gutka worth Rs 350000 seized in police raid at NTC in Hingoli)

पोलिसांनी चालक सागर लोखंडे रा . गंगानगर याच्याकडे याबाबत विचारणा केली असता त्याने उडवा उडवीची उत्तरे दिली . त्यांनतर पोलिसांनी पोती उघडून बघितली असता त्यात गुटखा असल्याचे आढळून आले. पोलिसांनी सागर यास ताब्यात घेतले असून त्याच्या कडून तीन लाख पन्नास हजार रुपये किंमतीची गुटख्याची पोती व एक वाहन असा पाच लाख रुपयांचा ऐवज जप्त केला आहे. या प्रकरणी आनंद अग्रवाल व चालक सागर लोखंडे याच्या विरुद्ध गुन्हा दाखल करण्याची प्रक्रिया सुरु असल्याचे पोलिसांनी सांगितले.