शेरुसिंघ उर्फ शेरा प्रकरणाची सुनावणी २१ जानेवारी 

नांदेड : जिल्‍हादंडाधिकारी यांच्‍या आदेशानुसार उपविभागीय अधिकारी लतीफ पठाण हे गोळीबारात मयत शेरुसिंघ उर्फ शेरा दलबिरसिंघ खैरा रा. माळटेकडी (नांदेड) याच्‍या मृत्‍युची दंडाधिकारीय चौकशी सुरू करीत आहेत. 

स्थानिक गुन्हे शाखेचे सहाय्यक पोलिस निरीक्षक पांडूरंग भारती व त्‍यांचे सहकारी पोलिस कर्मचारी तानाजी येळगे (बनं.१६०१) मोतीराम पवार (बनं.३१६०) शेख कलीम (बन.३०८१) यांनी ता. चार नोव्हेंबर २०१९ रोजी दुपारी अडीचच्या सुमारास पोलीस ठाणे भाग्‍यनगरमध्ये दाखल झालेल्या गुन्‍ह्यातील पाहिजे असलेला आरोपी शेरूसिंघ उर्फ शेरा दलबिरसिंघ खैरा रा. माळटेकडी, नांदेड याचा शोध घेत होते. अर्धापूर तालुक्यातील येळेगाव शिवारात अमरसिंघ चुंगीवाले यांचे शेतातील आखाड्यात उभ्‍या असलेल्‍या एका पांढ-या रंगाच्‍या टाटा सफारी गाडीतुन पोलीसांना पाहुन गाडीतुन उतरुन त्‍याने देशी बनावटीची पिस्‍टल हातात घेऊन पोलिस कर्मचारी तानाजी येळगेच्‍या दिशेने पिस्‍टलने एक गोळी फायर केली. त्‍याच क्षणी दुसरी गोळी सहाय्यक पोलीस निरीक्षक पांडुरंग भारती यांचेवर फायर करीत असतानाच त्‍यांनी स्‍वतः चे आत्‍मसंरक्षणार्थ व तानजी येळगे यांचा प्राण वाचविण्‍यासाठी केलेल्‍या गोळीबारात शेरुसिंघ उर्फ शेरा खैरा हा जखमी झाला होता. 

हेही वाचा-- कत्तीने हल्ला, पाच वर्षाचा तुरुंगवास

रुग्णालयाने केले मृत घोषीत 

जखमी आरोपीचे प्राण वाचविण्‍यासाठी त्‍यास तात्‍काळ पोलीस अधिकारी व कर्मचारी यांनी शासकीय रुग्‍णालय विष्‍णुपूरी नांदेड येथे उपचारासाठी दाखल केले. शासकीय रुग्‍णालय विष्‍णुपूरी नांदेड येथील वैद्यकीय अधिकारी यांनी शेरुसिंघ उर्फ शेरा खैरा यास तपासुन तो मरण पावल्‍याचे घोषीत केले. शेराच्या मृत्‍युचा तपास उपविभागीय पोलिस अधिकारी (शहर) अभिजीत फस्‍के यांचेकडे सोपविण्‍यात आला आहे.

एसडीओकडून चौकशी सुरू

प्रकरणात जिल्‍हाधिकारी यांचे आदेश क्र. २०१९/आरबी- १-डेस्‍क- २-टे-(४) दंडाधिकारी चौकशी-प्र.क्र.५४ ता. २१ नोव्‍हेंबर २०१९ अन्‍वये अर्धापूर पोलिस ठाण्याच्या हद्दीत शेरुसिंघ उर्फ शेरा  खैरा रा. माळटेकडी नांदेड यांच्‍या मृत्‍युच्‍या घटनेची दंडाधिकारीय चौकशी करणेसाठी उपविभागीय दंडाधिकारी नांदेड यांना आदेशीत केले आहे.

येथे क्लीक कराच-- हातकडीसह आरोपी फरार, पोलिसांना बलविले मामा

साक्ष पुरावे सादर करावेत

ज्‍या कोणास वर नमुद केलेल्‍या प्रकरणाशी संबंधी काही सांगावयाचे असल्‍यास किंवा साक्ष पुरावे नोंदवावयाचे असल्‍यास त्‍यांनी उपविभागीय दंडाधिकारी कार्यालय नांदेड यांचे कार्यालयात त्‍यांचे समक्ष ता. २१ जानेवारी २०२० रोजी दुपारी चार वाजता आपले म्‍हणने मांडावे व साक्ष पुरावे सादर करावेत. असे आवाहन उपविभागीय अधिकारी श्री. पठाण यांनी केले आहे.