हिंगोली : दहा वर्षीय मुलाचा वीस तासानंतर मृतदेह आढळला. जवळा बाजार येथील घटना

हिंगोली : औंढा नागनाथ तालुक्यातील जवळाबाजार येथून वाहणाऱ्या कॅनॉलमध्ये गुरुवारी (ता. एक) दहा वर्षीय मुलगा पोहताना वाहून गेला होता. त्याचा मृतदेह विस तासानंतर शुक्रवारी ( ता. दोन) पहाटे सापडला. यासाठी हट्टा पोलिस, नातेवाईक व गावकऱ्यांनी त्याचा शोध घेतला होता.

याबाबत माहिती अशी की, शुक्रवारी दुपारी बारा वाजण्याच्या सुमारास गजानन समाधान काटकर हा दहा वर्षीय मुलगा धुणे धुण्यासाठी आलेल्या
आजी सोबत पोहण्यासाठी कॅनॉलवर आला होता. गजानन हा कॅनॉलच्या वाहत्या पाण्यात पाठीला प्लास्टिकची कॅन बांधून पोहत असताना पाठीला बांधलेली प्लॅस्टिकची कॅन सुटली आणि मुलगा पाण्याच्या प्रवाहाने वाहून गेला. या बाबत हट्टा पोलिस ठाण्यात नोंद करण्यात आली होती. पोलिस गजानन काटकरचे नातेवाईक व गावकरी या दहा वर्षीय मुलाचा शोध घेत होते. 

हेही वाचा - नांदेड जिल्ह्यातील दोन शेतकऱ्यांना राज्य शासनाचे पुरस्कार जाहीर

या संबंधी कालव्याचे पाणी काही वेळासाठी बंद करण्यासाठी संबंधित विभागाला पोलिसांनी पत्रसुद्धा दिले होते. तसेच यासंबंधी आजूबाजूच्या नागरिकांना मुलगा दिसल्यास कळविण्याचे आवाहन सहाय्यक पोलिस निरीक्षक गजानन मोरे यांनी केले होते. तसेच त्याचा शोध घेण्यासाठी कालव्यात ठिकठिकाणी जाळ्या टाकण्यात आल्या होत्या. रात्री उशिरापर्यंत त्याचा शोध सुरु होता मात्र तो सापडला नाही. कालव्याचे पाणी बंद झाल्यावर शुक्रवारी सकाळी वाहून गेलेल्या गजाननचा मृतदेह जवळच सापडला. त्याचा मृतदेह पाहून नातेवाईकानी हंबरडाच फोडला.

संपादन- प्रल्हाद कांबळे