Hingoli : शेतकरी कुटुंबातील मुलीचे विक्रमी यश

साखरा : तालुक्यातील साखरा गावातील शेतकरी कुटुंबातल्या तरुणीची कर निरीक्षकपदी निवड झाली आहे. तिने राज्यात मुलींमध्ये सहावा क्रमांक मिळविल्याचा दावा केला आहे. महाराष्ट्र लोकसेवा आयोगामार्फत राज्य कर निरीक्षक पदासाठी घेण्यात आलेल्या २०२१ च्या मुख्य परीक्षेचा निकाल नुकताच जाहीर झाला आहे. यात सेनगाव तालुक्यातील साखरा येथील विद्या अंकुश कायंदे या शेतकरी कुटुंबातील मुलीने मेहनतीच्या जोरावर घवघवीत यश संपादन केले आहे. साखरा गावासारख्या ग्रामीण भागातून विद्याने मेहनतीच्या जोरावर आई-वडिलांचं स्वप्न पूर्ण केले आहे.

एमपीएससी अंतर्गत घेण्यात आलेल्या एसआयटी परीक्षेत विद्याला २७७.५ मार्क मिळाले आहेत. या गुणांसह विद्याने राज्यात सहावा क्रमांक पटकावला आहे. २०२१ साली विद्याने सदरील परीक्षा दिली होती. विद्याच्या या यशाबद्दल तिचे सर्व स्तरातून कौतुक केले जात आहे. शेतकरी कुटुंबातील विद्या ही सुरुवातीपासूनच शिक्षणात हुशार होती. तिने सुरुवातीचे दहावीपर्यंतचे शिक्षण साखरा गावातील जिल्हा परिषद शाळेत घेतले. नंतर १२ वी पर्यंत तिने परभणी येथील नवोदय विद्यालयात शिक्षण पूर्ण केले. सध्या ती साखरा येथे ग्रामीण डाक सेवक या पदावर कार्यरत आहे. ही नोकरी करत तिने एमपीएससीपरीक्षा दिली होती.

यशामागे भावाचा सिंहाचा वाटा

विद्याच्या या यशा मागे तिच्या भावाचा सिंहाचा वाटा आहे. विद्या लहान असतानाच तिच्या वडिलांचा मृत्यू झाला आहे. विद्याचा भाऊ विकास कायंदे यांनी स्वतःचे शिक्षण कमी केले. मात्र आपल्या बहिणीच्या शिक्षणाची जबाबदारी घेऊन तिला अधिकारी केले.