Hingoli : कळमनुरीत पाणीटंचाईची आढावा बैठक

कळमनुरी : जल जीवन योजनेंतर्गत कार्यारंभ झालेल्या ठिकाणी योजनेसंदर्भात जागेच्या अडचणी दूर करून ही कामे तातडीने सुरू करावीत अशा सूचना आमदार संतोष बांगर यांनी गुरुवारी (ता. ३०) ग्रामीण पाणीटंचाई आढावा बैठकीत संबंधितांना दिल्या.

येथील तहसील कार्यालयाच्या सभागृहात ग्रामीण पाणीटंचाई आढावा बैठक घेण्यात आली. यावेळी आमदार बांगर, ग्रामीण पाणी पुरवठा विभागाचे कार्यकारी अभियंता एस. एस. वाटेगावकर, लघू पाटबंधारे विभागाचे कार्यकारी अभियंता श्री भंगिरे, गटविकास अधिकारी प्रदीप बोंढारे, अभियंता आनंद पतंगे, राजेंद्र शिखरे, रामभाऊ कदम, दत्ता बोंढारे यांच्यासह ग्रामसेवक, तलाठी व सरपंच यांची उपस्थिती होती.

आढावा बैठकीत पाणीटंचाई आराखडा वाचन करण्यात आले. पाणीटंचाई असलेल्या गावांमधून पाणीटंचाई निवारणार्थ हाती घेण्यात आलेल्या उपाययोजना संदर्भात माहिती देण्यात आली. यावेळी आमदार बांगर यांनी पाणीटंचाई असलेल्या गावांमधून तातडीने उपाययोजना करण्याच्या सूचना प्रशासनाला दिल्या.

सोबतच जलजीवन योजनेच्या कामाला मंजुरी मिळाल्यानंतरही जागेअभावी येणाऱ्या अडचणी तातडीने दूर करण्याच्या सूचनाही त्यांनी संबंधित अधिकाऱ्यांना दिल्या. बैठकीचे सूत्रसंचालन विस्तार अधिकारी श्री. पाईकराव यांनी केले. आभार गटविकास अधिकारी श्री बोंढारे यांनी मानले.