हिंगोली : चोरलेला दारुसाठा महावितरणच्या जुन्या निवासस्थानातून जप्त

हिंगोली : शहरातील जुना मोंढा भागातुन २२ देशीदारुचे बॉक्स अज्ञात चोरट्यांनी दुकानातुन चोरुन नेले होते. शहर पोलिसांनी या गुन्ह्याचा छडा लावुन चोरटे निष्पन्न केल्यानंतर चोरुन नेलेला दारुसाठा महावितरणच्या जुन्या निवासस्थानात आढळला.

याबाबत मिळालेली माहिती अशी की, हिंगोली येथील जुना मोंढा भागातील सुर्यकांत गव्हाणे यांच्या दारु दुकानाचे शटर चोरट्यांनी तोडुन दुकानात प्रवेश करुन २२ देशीदारुचे बॉक्स व सीसीटीव्हीचे डिव्हीआर बॉक्स असा ५६ हजार ८०० रुपयांचा माल ता. १६ एप्रील रोजी चोरुन नेला होता. या प्रकरणी ता. १७ एप्रिलला हिंगोली शहर पोलिसात अज्ञात चोरट्यावर गुन्हा दाखल करण्यात आला होता. जिल्हा पोलिस अधिक्षक राकेश कलासागर, सहाय्यक पोलिस अधिक्षक यतिष देशमुख यांच्या मार्गदर्शनाखाली पोलिस निरीक्षक पंडीत कच्छवे, हवालदार शेख शकील, सुधीर ढेंबरे, शेख मुजीब, दिलीप बांगर, गजानन होळकर यांच्या पथकाने गुन्ह्यातील चोरट्यांचा शोध घेण्यास सुरुवात केली. विशेष म्हणजे चोरट्यांनी दुकानासमोरील सीसीटीव्ही फोडला होता. परंतु एका उंच ठिकाणी असलेल्या सीसीटीव्हीमध्ये चोरट्यांचे फुटेज कैद्य झाले होते. त्या वर्णनावरुन चोरटे निष्पन्न करण्यात आले.

हेही वाचा - प्राध्यापक भरतीबाबत शासनाची उदासीनताच दिसत आहे

तीन महिलांना अटक

हिंगोली येथील पारधीवाडा भागातुन तीन महिलांना ताब्यात घेतल्यानंतर त्यांनी या गुन्ह्यांची कबुली दिली. तसेच गुन्ह्यामध्ये रवि चव्हाण हा सुध्दा असल्याची माहिती महिलांनी पोलिसांना दिली. चव्हाण हा सध्या फरार असून तिन्ही महिलांना पोलिसांनी ताब्यात घेतल्यानंतर चोरुन नेलेल्या दारुच्या बॉक्सची माहिती विचारली असता महावितरण कार्यालयाच्या परिसरात असलेल्या जुन्या निवासस्थानामध्ये ठेवण्यात आल्याची माहिती महिलांनी दिल्यानंतर पोलिसांनी तेथे जावुन पाहणी केली. यावेळी एका जुन्या निवासस्थानात दरवाज्याला कुलूप लावलेल्या खोलीतुन २२ देशी दारुचे बॉक्स हस्तगत करण्यात आले.

संपादन- प्रल्हाद कांबळे