हिंगोली : पुरजळ पाणी पुरवठा योजनेचा विज पुरवठा सुरु करण्यासाठी झेडपीचा पुढाकार

हिंगोली : औंढा तालुक्यातील २० गावांना पुरजळ प्रादेशिक पाणी पुरवठा योजनेचा लाभ होणार आहे. मात्र त्यासाठी विद्युत पुरवठा बंद आहे. हा विज पुरवठा सुरळीत करावा यासाठी जिल्हा परिषदेच्या ग्रामीण पाणी पुरवठा विभागाने विज वितरणचे अधीक्षक अभियंता यांना बुधवार (ता. १०) पत्राद्वारे मागणी केली आहे.

सिद्धेश्वर धरणातून पुरजळ येथून विस गावाना प्रादेशिक पाणी पुरवठा केला जातो. मात्र या योजनेकडे विज बिल थकीत असल्याने विजवितरण कंपनीने विज पुरवठा खँडीत केल्याने पाणी पुरवठा बंद झाला आहे. परंतू नागरिकांची पाण्यासाठी गैरसोय होऊ नये यासाठी जिल्हा परिषदेचे सदस्य अंकुश आहेर यांनी थकीत बिलाचा भरणा करण्यासाठी जिल्हा परिषदेकडे अनेक वेळा सीईओ राधाबीनोद व संबंधित विभागाशी चर्चा केली. त्यानंतर विज देयकाची थकीत असलेली २६ लाख रुपयांची रक्कम महावितरणकडे भरणा केली. 

विज देयकाच्या रक्कमेपैकी तीस टक्के रक्कम भरणा करण्याचे जिल्हा परिषदेला पत्राद्वारे काळविले

मात्र तरी देखील विज वितरण कंपनीने सदर योजनेचा विद्युत पुरवठा सुरु करण्यासाठी एकूण थकीत विज देयकाच्या रक्कमेपैकी तीस टक्के रक्कम भरणा करण्याचे जिल्हा परिषदेला पत्राद्वारे काळविले आहे. त्यानुसार जिल्हा परिषदेने ऑक्टोबर २०२० मध्ये विज वितरणने पाठविलेल्या पत्रानुसार तीस टक्के रकमेपैकी उर्वरित ६९ लाख तीन हजार ९८५ रुपये रक्कम भरणा केली. तरी देखील अद्याप विज पुरवठा सुरु झाला नाही. त्यामुळे अंकुश आहेर यांनी दोन दिवसांपूर्वी सीईओ राधाबीनोद शर्मा यांची भेट घेत कैफियत मांडली. त्यांनी तातडीने विज वितरणचे अधीक्षक अभियंता सुधाकर जाधव यांना जिल्हा परिषदेत बोलावून घेत चर्चा केली. पुरजळ विस गावे योजनेचा पाणी पुरवठा सुरु करण्याचे सांगितले. यावेळी अतिरिक्त सीईओ अनुप शेंगुलवार, ग्रामीण पाणी पुरवठा विभागाचे कार्यकारी अभियंता श्री दासरवार यांची उपस्थिती होती.

संपादन- प्रल्हाद कांबळे