भोकरदनच्या नदीला पूर, जाफ्राबाद, आलापूर रस्त्यावरील पूल बंद

भोकरदन (जि. जालना) : भोकरदन शहरासह तालुक्यात सोमवार (ता.28) रात्री अकरा वाजेपासून जोरदार पाऊस सुरू आहे. त्यामुळे शहरातून वाहणाऱ्या केळणा नदीला मोठा पूर आला असून, या नदीवरील जाफ्राबाद मुख्य रस्त्यावरील पूल व आलापूर कडे जाणारा सिमेंट पूल वाहतुकीसाठी पूर्णपणे बंद करण्यात आला आहे. परिणामी अनेक गावांचा शहराशी संपर्क तुटला आहे.

पावसाळ्याच्या सुरुवातीला वाट पाहायला लावणाऱ्या पावसाने आता गत काही दिवसांपासून तालुक्यात मुक्काम ठोकला असून, अधूनमधून पावसाचा जोर अधिक वाढत असल्याने तालुक्यात सगळीकडे पाणीच पाणी झाले आहे. त्यामुळे तालुक्यातील गिरीजा, पूर्णा, केळणा, रायघोळ, जुई नद्या दुथडी भरून वाहत आहे. त्यात सोमवारी रात्री पासून देखील मुसळधार पाऊस सुरू असल्याने भोकरदन शहरातून वाहणाऱ्या केळणा नदीला मोठा पूर आला आहे. त्यामुळे शहरातून जाफ्राबादकडे जाणाऱ्या मुख्य रस्त्यावरील पुलावरून पुराचे पाणी वाहत असल्याने हा पूल वाहतुकीसाठी पूर्णपणे बंद करण्यात आला आहे. परिणामी विदर्भातील अकोला, खामगाव, बुलढाण्यासह तालुक्यातील अनेक लहान मोठ्या गावांचा तालुक्याशी संपर्क तुटला आहे. तसेच शहरातून आलापूर कडे जाणाऱ्या सिमेंट पुलावरून देखील पुराचे पाणी सुरू असल्याने आलापूर, उस्मानपेठ, गोकुळ, प्रल्हादपूर, वाडी आदी भागाचा शहराशी संपर्क तुटला आहे.