Jalna : शेतकऱ्यांच्या पीकविम्याकडे नजरा

आष्टी : पंतप्रधान पीकविमा योजना अंतर्गत परिसरातील अनेक शेतकऱ्यांनी विमा भरला. परतीच्या पावसाने पिकांचे मोठे नुकसानही झाले. मात्र परिसरातील शेकडो पात्र शेतकरी अद्याप पीकविमा रक्कमेपासून वंचित राहिले आहेत. रब्बी हंगाम तोंडावर असल्याने पीकविम्याकडे सध्या शेतकऱ्यांच्या नजरा आहेत.

गेली दोन वर्ष शेतकरी कोरोना संकट, लॉकडाऊन, त्यातच निसर्गाचा लहरीपणा आणि अतिवृष्टी, बेमोसमी पाऊस या चक्रात अडकला आहे. दरम्यान, यंदाही पाऊस चांगला होईल या आशेने शेतकऱ्यांनी उत्साहाने खरीप पेरणी केली.मात्र अतिवृष्टी पावसाने पुन्हा एकदा शेतकऱ्यांच्या आशांवर पाणी फेरले.

परिसरात अतिवृष्टीमुळे तसेच परतीच्या पावसाने कपाशी,तूर, सोयाबीन, मूग आदी पिकांचे मोठ्या प्रमाणात नुकसान झाले. विशेष म्हणजे कपाशी व सोयाबीन पिकाचे अतोनात नुकसान झाल्याने निम्म्याहून अधिक उत्पादन हातचे गेले. या पार्श्वभूमीवर पीकविमा कंपनीकडून नुकसान भरपाई मिळणे गरजेचे आहे. मागील आठवड्यात आष्टी येथील युवा शेतकरी संघर्ष समितीच्या वतीने परतूर उपविभागीय अधिकारी यांच्या कार्यालयावर मोर्चा काढण्यात आला. त्यामुळे संबंधित कंपनीने काही शेतकऱ्यांचा पीकविमा मंजूर केला.

बॅंक खात्यात पहिल्या टप्प्यातील रकमा टाकण्यात आल्या. मात्र परिसरातील ७५ टक्के अजूनही पीकविम्याच्या रकमेपासून वंचित राहिले आहेत. दरम्यान, दुसऱ्या टप्प्यात शेतकऱ्यांच्या बँक खात्यात रकमा टाकण्यात येतील असे सांगण्यात येते. मात्र आता रब्बी हंगामाच्या तयारीला शेतकरी लागले आहेत. पेरणी, बियाणे, खत खरेदीसाठी शेतकऱ्यांना पैशाची आवश्‍यकता आहे. त्यामुळे पीकविम्याचे लवकर वाटप करण्याची मागणी शेतकरी करीत आहेत. संबंधित हेल्पलाईनवरही तक्रारींची दखल घेतली जात नसल्याचे आकोली येथील शेतकरी दामोदर सोळंके यांनी सांगितले.

रब्बी हंगामासाठी पैशाची तजवीज म्हणून शेतकऱ्यांना पीकविमा मिळणे गरजेचे आहे. याबाबत जिल्हा प्रशासनाने लक्ष देऊन शेतकऱ्यांनी पीकविमा मिळवून द्यावा.

- कोंडीबा बरसाले शेतकरी, आसनगाव