परंडा (जि. धाराशिव) - पूर्ववैमनस्यातून अपघाताचा बनाव करून मित्राचा खून केल्याचा धक्कादायक प्रकार समोर आला आहे. संबंधिताच्या पत्नीच्या फिर्यादीनुसार पोलिसांनी दोघा संशयितांविरुद्ध गुन्हा दाखल करून चौकशी सुरू केली आहे..कंडारी- ते सोनारी (ता. परंडा) मार्गावर सोमवारी (ता. १५ ) रात्री दराच्या सुमारास एका अपघातात मोतीराम जाधव यांचा मृत्यू झाल्याचे त्याच्या मित्राने कुटुंबीयांना सांगितले. मात्र हा अपघात नसून जुन्या भांडणातून मित्रांनी पतीचा खून केल्याची तक्रार मोतीराम यांची पत्नी सोनाली जाधव यांनी आंबी (ता. भूम) पोलिस ठाण्यात दिली..पती मोतीराम हे सोमवार रात्री नऊच्या सुमारास कुटुंबासह घरी जेवण करत होते. त्यावेळी त्यांचे मित्र विष्णू कालिदास तिंबोळे आणि योगेश नागेश तिंबोळे (रा. कंडारी) हे दुचाकीने आले. पप्पु रावखंडे यांच्या बंगल्यावर पार्टी असून जेवायला चल असे सांगून त्यांनी मोतीराम यांना जेवणाच्या ताटावरून उठवले आणि दुचाकीवर बसवून सोबत नेले.रात्री दहाच्या सुमारास विष्णू तिंबोळे हा एकटाच मोतीराम यांच्या घरी परतला आणि त्याने पप्पू रावखंडे यांच्या बंगल्यासमोर अपघात झाल्याचे सांगितले. घटनास्थळी धाव घेतली असता, मोतीराम हे रस्त्यावर पडलेले होते. त्यांच्या डोक्याला दुखापत झाली होती, चेहरा ठेचलेल्या स्थितीत होता, रस्त्यावर रक्त सांडले होते, असे सोनाली यांनी फिर्यादीत म्हटले आहे..मोतीराम जाधव, विष्णू तिंबोळे आणि योगेश तिंबोळे यांच्यात वाद होता. त्यांच्यातील भांडण तात्या रावखंडे व पप्पू रावखंडे यांनी सोडवण्याचा प्रयत्नही केला होता. जुन्या भांडणाच्या रागातून विष्णू तिंबोळे व योगेश तिंबोळे यांनी मोतीराम यांच्या डोक्यात जड वस्तूने वार करून त्यांचा खून केला आणि अपघाताचा बनाव करण्याचा प्रयत्न केल्याचा आरोप फिर्यादीत केला आहे..पोलिसांनी केला दोघांवर गुन्हा दाखलआंबी पोलिस ठाण्याचे सहायक निरीक्षक गोरक्ष खरड व पथकाने घटनास्थळी भेट घेतली. पोलिसांनी संशयित विष्णू तिंबोळे आणि योगेश तिंबोळे यांच्याविरुद्ध गुन्हा नोंद केला. त्यांना ताब्यात घेतले असून कसून चौकशी सुरू असल्याचे पोलिसांनी सांगितले..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
