प्रसूतिगृहाशेजारी जमिनीवर उपचार, नांदेडच्या शासकीय रुग्णालयातील चित्र

नांदेड - सध्या निवडणूक काळात सरकारकडून आरोग्य सुविधेचा दिंरोडा पिटल्या जात आहे. आयुष्यमान भारत, महात्मा जोतिबा फुले जन आरोग्य योजनेच्या मुद्दयांवर मते मागितलीजात आहेत. एवढेच नाही तर गरजू रुग्णांना चांगले उपचार देऊ, असे आश्वासनही दिले जात आहे. पण, प्रत्यक्षात शासकीय रुग्णालयांमध्ये सोयी-सुविधांचा अभाव आहे. नांदेड येथील शंकरराव चव्हाण शासकीय रूग्णालयात तर प्रसूतिगृहाजवळ रुग्णांना झोपवून चक्क फरशीवर उपचार केले जात आहेत. 

सध्या जिल्ह्यात साथीच्या आजारांची साथ आहे. त्यामुळे रुग्णालयांत गर्दी होत आहे. पण, बहुतांश गरजूंना खासगी रुग्णालयात उपचार घेणे शक्‍य नाही. त्यामुळे ते शासकीय रुग्णालयात  जात आहेत. असे असताना येथील शंकरराव चव्हाण शासकीय रूग्णालयात सुविधांचा वानवा आहे. येथे रुग्णांना प्रसूतिगृहांशेजारी फरशीवर झोपवून सलाइन चढविले जात आहे. त्यामुळे रुग्ण आणि नातेवाइकांमधून प्रशासनाप्रति रोष व्यक्त होत आहे. 
  
येते थंडी भरून 
सध्या ढगाळ वातावरण आहे. अधून-मधून अवेळी पाऊसही पडत आहे. त्यामुळे गारवा निर्माण झाला आहे. अशा स्थितीत रुग्णांना चक्क फरशीवर झोपवून सलाइन चढवले जात आहे. फरशी थंड असल्याने आणि त्यातच वरून सलाइन जात असल्याने रुग्णांना थंडी भरून येत आहे. 
 
खाटा वाढवाव्या 
या रुग्णालयात खांटाची संख्या अपुरी आहे. त्यामुळे रुग्णांची हेळसांड होत आहे. याकडे आरोग्य विभागाने लक्ष देऊन खांटांची संख्या वाढवावी, अशी मागणी रुग्ण आणि नातेवाइकांमधून
होत आहे.