Latur : लातूरमध्ये बस-दुचाकीची समोरासमोर धडक, बाप-लेकाचा मृत्यू

उजनी (जि.लातूर) : औसा-तुळजापूर राष्ट्रीय महामार्गावर उजनी मोड येथे कर्नाटक राज्यातील बस आणि दुचाकीच्या धडकेत दुचाकीवरील बापलेकाचा जागीच मृत्यु झाल्याची दुर्दैवी घटना सोमवारी (ता.२५) दुपारी घडली.पोलिसांनी दिलेल्या माहितीनुसार, हणमंत जगताप (वय ६५) आणि त्यांचा मुलगा ज्ञानेश्वर जगताप (वय २८) अशी मृतांची नावे आहेत. ते भातागळी (जि. उस्मानाबाद) येथील रहिवाशी असून सोमवारी उस्मानाबादहून दोघेही दुचाकीवरून (एमएच २५ झेड ४५३८) गावाकडे (Latur) परतत असताना कर्नाटक राज्यातील लातूर-तालिकोट या बसची (केए २८ एफ २४५४) त्यांच्या दुचाकीसोबत समोरासमोर धडक बसली. त्यामध्ये दुचाकीवरील बापलेकाचा जागीच मृत्यू झाला. येथील प्राथमिक (Accident In Latur) आरोग्य केंद्रात दोघांच्याही मृतदेहाचे शवविच्छेदन करण्यात आले. पुढील तपास भादा पोलिस करित आहेत.

महामार्गावरील वाहतुकीचे नियम धाब्यावर

दरम्यान सोलापूरच्या दिशेने जाणारी ही बस उजनी मोडवरील हॉटेलवर नाष्टा करण्याच्या हेतूने थांबा घेण्याकरिता वाहतुकीचे नियम मोडत चुकीच्या दिशेने जात होती. त्यामुळे हा अपघात झाला असल्याचे प्रथमदर्शनी निदर्शनास येत आहे. अशा पद्धतीने अनेक वाहने या महामार्गावरील वाहतुकीचे नियम धाब्यावर बसवून वाहतूक करत आहेत. यामुळे असे अपघात घडून अनेकांना आपला जीव गमवावा लागला आहे. याकडे महामार्ग व वाहतूक प्रशासनाचे पुर्णतः दुर्लक्ष होत आहे.