सर्पदंशाने हिरावला कर्ता माणूस, शेतकरी कुटूंबावर दुःखाचा डोंगर

भोकरदन (जि. जालना) : झोपेत असताना अचानक विषारी सापाने हल्ला करून तरुण शेतकऱ्याला दंश केला. साप चावल्याने लक्षात येताच शेतकऱ्याला जखमी अवस्थेत उपचारासाठी ग्रामीण रुग्णालयात दाखल केले. मात्र, साप अधिक विषारी असल्याने उपचारादरम्यान शेतकऱ्याचा दुर्दैवी मृत्यू झाला. ही घटना भोकरदन (Bhokardan) तालुक्यातील फत्तेपूर येथे बुधवारी (ता.22) रात्री ११ वाजता घडली. बाळू मीठू गायकवाड (वय 35) असे या घटनेत मृत झालेल्या शेतकऱ्याचे नाव आहे. मिळालेल्या माहितीनुसार भोकरदन तालुक्यातील फत्तेपूर येथील शेतकरी बाळू गायकवाड हे गावातील (Snake Bite) मारोती मंदिराजवळ राहायला आहे. बुधवारी रात्री ते जेवण करून नेहमीप्रमाणे झोपी गेले. रात्री 11 वाजेच्या सुमारास अचानक एका विषारी सापाने त्यांच्या पायावर दंश केला. साप चावल्याचे लक्षात येताच त्यांना भोकरदन येथील ग्रामीण रुग्णालयात उपचारासाठी दाखल करण्यात आले. या ठिकाणी प्राथमिक उपचार करून त्यांना जालना येथे हलविण्यात आले असता. या ठिकाणी उपचार सुरू असतांना रात्री दीड वाजेच्या सुमारास (Jalna) त्यांचे निधन झाले. अचानक घडलेल्या या घटनेने शोककळा पसरली असून, ग्रामीण रुग्णालयात उत्तरीय तपासणी करून गुरुवारी सकाळी 11 वाजता फत्तेपूर येथे अंत्यसंस्कार करण्यात आले.

कर्त्या पुरुषाच्या निधनाने कुटुंबीयांवर दुःखाचा डोंगर

बाळू गायकवाड हे त्यांच्या कुटुंबातील एकमेव कर्ता सदस्य होते. यापूर्वी त्यांच्या भावाचे अपघाती तर वडिलांचे हृदयविकाराने निधन झाले होते. आता त्यांच्या अचानक मृत्यूने कुटुंबियांवर दुःखाचा डोंगर कोसळला आहे. त्यांच्या पश्चात आई, पत्नी, दोन लहान मुले, दोन बहिणी असा परिवार आहे.