आधी लगीन ‘जलयुक्त’चे नंतर ‘ती’चे...!

हडोळती - तिवटघ्याळ (ता. चाकूर) जेमतेम ५० ते ६० उंबरठ्यांचे गाव अन्‌ त्या गावात एका सर्वसामान्य कुटुंबात जन्मलेल्या युवतीच्या लग्नाला जिल्हाधिकारी जी. श्रीकांत वऱ्हाडी म्हणून हजर राहणार हा औत्सुक्‍याचा विषय होता. जिल्हाधिकारी लग्नाला येणार म्हणून प्रशासनही सज्ज होते.

प्रशासकीय कामात व्यस्त असताना जिल्हाधिकाऱ्यांनी वेळात वेळ काढून लग्नाला वऱ्हाडी म्हणून उपस्थिती लावली. स्वतःच्या लग्नापेक्षा जलयुक्त शिवारच्या कामांना प्राधान्य देणाऱ्या येथील कृषी सहायक सुनीता चात्रे यांच्या लग्नाला उपस्थित राहण्याचा दिलेला शब्द श्रीकांत यांनी बुधवारी (ता. दोन) पाळला.  

सुनीता चात्रे यांचे लग्न डिसेंबर २०१७ महिन्यात ठरले होते. हडोळतीला जलयुक्त शिवारचे मोठे काम होते. दुष्काळमुक्तीच्या दिशेने गावाचे हे पाऊल मोठे होते. यातच ‘सकाळ रिलीफ फंडा’ने नाळा सरळीकरणासाठी फंड दिला होता. ‘सकाळ रिलीफ फंडा’तून नाला सरळीकरणाचे उद्‌घाटन जी. श्रीकांत यांच्या हस्ते झाले. या वेळी हडोळतीच्या अकरा नाल्यांचे सरळीकरण होत असल्याची माहिती त्यांना मिळाली होती. या वेळी एवढे मोठे काम होत असताना ही जबाबदारी नवख्या चात्रे यांच्यावर होती. या कामांतून दहा दशलक्ष घनफूट पाणी साठणार होते. हे काम वेळेत पूर्ण करण्यासाठी जिल्हाधिकाऱ्यांनी सूचनाही केली होती; परंतु लग्न ठरल्याने या कामात अडथळा येणार होता. गावाच्या भल्यासाठी स्वतःच्या लग्नाची तारीख पुढे ढकलत जलयुक्त शिवाराची कामे वेळेत पूर्ण करणाऱ्या चात्रे यांच्या कामाची दखल जिल्हाधिकाऱ्यांनी घेतली होती. जलयुक्त शिवाराच्या आढावा बैठकीत चात्रे यांचा गौरव करीत त्यांच्या लग्नाला वऱ्हाडी म्हणून उपस्थिती राहण्याचा शब्द त्यांनी दिला आणि तो पाळलाही. या लग्नात जिल्हाधिकाऱ्यांच्या तोंडून मुलीचे कौतुक ऐकून वधुपिता-मातेलाही मुलीचा अभिमान वाटला.