उत्तराखंडामध्ये १५ हजार फुट उंच हिम शिखरावरून शिवरायांना अभिवादन

परभणी : उत्तराखंडमधील पांगरचुला व तुंगनाथ या दोन हिमपर्वतावर भारतातील विविध राज्यातून एकत्र येत तरूण शिवप्रेमी गिर्यारोहकांनी १५ हजार फूट उंच हिमशिखरावर छत्रपती शिवाजी महाराजांना जयंतीनिमित्त शिवघोषणा देत अभिवादन केले व उत्साहात शिवजयंती (Shiv Jayanti) साजरी केली. दिल्ली येथील तरूण राहुल शर्मा या गिर्यारोहकाने उत्तराखंडमधील पांगरचूला व तुंगनाथ येथे या हिवाळी मोहिमेची योजना आखली. हैदराबाद येथील हर्षादित्य बिजापुरी व परभणीचे रणजित कारेगावकर यांनी १९ फेब्रुवारी रोजी पांगरचुला व तुंगनाथ या हिमपर्वतावर शिवजयंती साजरी करायची ठरवले. १८ फेब्रुवारी रोजी तुगासी या गावातून गिर्यारोहणास सुरूवात झाली. (Mountaineers Celebrate Shiv Jayant At Ice Mountain, Three Parbhani Youths Participate)

सर्व गिर्यारोहकांनी सायंकाळी खुलारा येथे उणे १५ अंश तापमानात हिमपर्वतावरील बेसकॅम्पवर मुक्काम केला. १९ फेब्रुवारी रोजी सकाळी ८ वाजता सर्व गिर्यारोहक खुलाराहून पांगरचुला हिमपर्वत सर करण्यास रवाना झाले. सकाळी दहा वाजता शिखरावर जाऊन शिवप्रतिमा असलेले ध्वज फडकवून 'छत्रपती शिवाजी महाराज की जय' चा जयघोष करत सर्वांनी शिवरायांना अभिवादन केले. तेलगू भाषिक हर्षादित्य बिजापुरी यांनी शिवस्तुतीपर मराठी घोषणा गाऊन एक वेगळा रोमांच निर्माण केला. दुसऱ्या दिवशी २० फेब्रुवारी रोजी जगातील सर्वांत उंच शिवमंदिर असलेल्या तुंगनाथ येथेही गिर्यारोहन करून शिवघोषणा देत या गिर्यारोहकांनी शिवजयंती साजरी केली.

मोहिमेत यांचा सहभाग

परभणीचे (Parbhani) सहायक निबंधक माधव यादव, रणजित कारेगावकर, विष्णू मेहेत्रे, प्रदीप धर्मशेट्टी, राजस्थान येथील संदीप सैनी, उत्तराखंड गढवाल येथील रोहित शर्मा, दिल्ली येथील राहुल शर्मा, विष्णू सिंग, उत्तराखंड काशीपुरची काजल गुप्ता, तेलंगणाचे हर्षादित्य बिजापुरी, डॉ. श्रीकांत व डॉ. उदयकुमार, स्थानिक गाईड सुनिल सिंग आदी तरूण गिर्यारोहकांनी सहभाग नोंदवत शिवजयंती उत्साहात साजरी केली.