MPSC Result Delay: राज्यसेवा २०२४ अंतिम यादी अजूनही प्रलंबित; स्पर्धा परीक्षा देणारे तरुण हवालदिल

बीड: जिल्ह्यातील शेकडो तरुणांनी डोळ्यात तेल घालून पाहिलेले राज्‍यसेवेचे स्वप्न आता प्रशासकीय दिरंगाईमुळे धुळीस मिळताना दिसत आहे. महाराष्ट्र लोकसेवा आयोगामार्फत घेण्यात आलेल्या राज्‍यसेवा परीक्षा-२०२४ ची संपूर्ण प्रक्रिया पूर्ण होऊनही, अंतिम निवड यादी अद्याप प्रसिद्ध झालेली नाही. या विलंबामुळे बीड जिल्ह्यातील अनेक गुणवंत उमेदवारांचा जीव टांगणीला लागला असून, त्यांच्यात तीव्र अस्वस्थता पसरली आहे.