Nangartas Mahadev Temple : निसर्गाच्या सान्निध्यातील नांगरतासचे शिवालय

मंठा - निसर्गाच्या सान्निध्यातील डोंगरदऱ्यांमध्ये वसलेले नांगरतास येथील शिवालयात श्रावण महिन्यात भाविकांची दर्शनासाठी भाविकांची मांदियाळी जमते. यंदाही येथे श्रावण सोमवारनिमित्त विविध धार्मिक कार्यक्रम होत आहेत.

नांगरतास येथे खोल दरीत महादेवाचे पुरातन हेमाडपंती मंदिर आहे. तीन बाजूने उंच डोंगर आहे. मंदिराच्या बाजूने झुळझुळ वाहणारा ओढा आहे. तसेच डोंगरावर विविध प्रकारची झाडी असून दिवसभर पक्षाचा किलबिलाट राहतो. अशा या निसर्गरम्य ठिकाणी अनेक भाविक भंडाऱ्याचे आयोजन करतात.

अनेक जण सहकुटुंब देवदर्शनाबरोबरच वनभोजनाचा आनंद घेतात. जिल्ह्यातील अनेक शाळा रविवारी मुद्दाम नांगरतास येथे सहली नेतात. या निसर्गरम्य वातावरणात विद्यार्थ्यांना डोंगरावर चढणे, ओढ्यातून झुळझुळ वाहणाऱ्या पाण्यात खेळणे, छोटा धबधबा दाखविणे, विविध पक्ष्यांची, वृक्षाची माहिती शिक्षक विद्यार्थ्यांना सांगतात.

नांगरतास या निसर्ग रम्य व धार्मिकस्थळी दरवर्षी श्रावण महिन्यात व पर्यटकांची मोठी गर्दी असते. यावर्षी तालुक्यात अत्यल्प पाऊस पडल्याने आतापर्यंत तालुक्यातील नदी, ओढे खळखळून वाहिले नाही. तसेच डोंगर माथ्यावरील हिरव्या गवताची वाढ देखील झाली नाही. तरीही नांगरतास येथे देवदर्शनाकरिता येणाऱ्या भाविकांची गर्दी होत आहे.

चाळीस-पंचेचाळीस वर्षांपूर्वी श्री रामगुरू महाराजांनी पुरातन महादेव मंदिराची दुरुस्ती व मंदिरासमोर लोकसहभागातून सभामंडपाचे काम केले. मंदिर परिसर विकसित केला. या ठिकाणी रामगिरी महाराज व सेवाधारी महाराज यांचे समाधी मंदिर आहे. भागवत गिरी महाराज व बालक गिरी महाराज परिसराची देखभाल करतात.

विविध शिवालयांमध्ये कार्यक्रम

श्रावण महिन्यात तालुक्यातील नीळकंठेश्वर, केदार वाकडी, हेलस तसेच नांगरतास, शंभू महादेव या धार्मिक व निसर्गरम्य स्थळी भाविक व पर्यटकांची मोठी गर्दी असते. या ठिकाणी विविध धार्मिक कार्यक्रमही होत आहेत.