माजलगाव धरणाचे नऊ दरवाजे अर्धा मिटरने उघडले

माजलगाव (जि. बीड) : गुरूवारच्या मध्यरात्री धरण कार्यक्षेत्रात झालेल्या दमदार पावसामुळे पाण्याची मोठी आवक धरणात येत होती. त्यामुळे शुक्रवारी ता. 24 धरणाचे अर्धा मिटरने नउ दरवाजे उघडले असुन सतरा हजार 977 क्युसेक प्रतिसेकंद वेगाने सिंदफणा नदीपात्रात पाणी सोडण्यात आले आहे.

माजलगाव धरण हे परतीच्या पावसावर भरते परंतु यावर्षी ऑगस्ट महिण्यात झालेल्या दमदार पावसामुळे धरण पुर्णक्षमतेने भरले. त्यामुळे 5 सप्टेंबर पासुन धरणात येणारे पाणी सिंदफणेत सोडणे सुरूच आहे. धरणात 431.74 मिटर एवढी पाणीपातळी असुन 449.20 दलघमी एवढा पाणीसाठा आहे. उपयुक्त पाणीसाठा 307.20 दलघमी झाला होता. धरणात येणा-या पाण्याची आवक जेवढी आहे तेवढेच पाणी सिंदफणा नदीपात्रात सोडण्यात येत आहे.

गुरूवारी ता. 23 मध्यरात्री धरण कार्यक्षेत्रात बरसलेल्या दमदार पावसामुळे शुक्रवारी धरणाचे 9 दरवाजे अर्धा मिटरने उघडत 17 हजार 977 क्युसेक वेगाने पाणी सिंदफणा नदीपात्रात सोडण्यात आले आहे. दरम्यान माजलगाव धरण पुर्ण क्षमतेने भरल्याने बीड, माजलगाव शहरासह अकरा खेड्यांच्या पिण्याच्या पाण्याचा प्रश्न मार्गी लागला आहे तर नांदेड, बीड, परभणी या तीन जिल्ह्यातील सिंचनाचा प्रश्न देखिल सुटला आहे.

"धरण शंभर टक्के भरलेले आहे. हवामान खात्याने आणखी पावसाचा अंदाज सांगीतलेला आहे. त्यामुळे धरणात जास्तीची आवक वाढल्यास सिंदफणा नदीपात्रात कोणत्याही क्षणी हे पाणी सोडण्यात येणार आहे. त्यामुळे नदीकाठच्या गावातील नागरिकांनी आपले पशुधन नदीकाठी आणु नये. जेणेकरून जिवीतहानी होणार नाही. नदीकाठापासुन दुर रहावे."

- बी. आर. शेख, धरण अभियंता.