वाळूज : कार्यकर्त्यांची कार उलटली; एक ठार, पाच जखमी

वाळूज (जि. औरंगाबाद) - चालकाचा ताबा सुटल्याने एक कार शेतात जाऊन उलटली. यात कारमधील एक जण ठार तर पाच जण जखमी झाले. त्यातील एकाची प्रकृती गंभीर आहे. ही घटना शुक्रवारी (ता. 19) रात्री सव्वाबाराच्या सुमारास दहेगाव बंगला जवळ घडली. विजय रमेश पारदे (वय 30 रा. मुरमी, ता. गंगापूर) असे मृताचे नाव आहे. यामध्ये शाकीर पटेल (27), सुदाम पारदे (32), मच्छिंद्र म्हस्के (28), विठ्ठल साठे (29) आणि बाळू सुराशे (27) (सर्व राहणार मुरमी) हे जखमी झाले. 

हे सर्व जण गंगापूर-खुल्ताबाद विधानसभा मतदार संघातील एका अमेदवाराचा प्रचार करून कारने (एमएच 12, एचएफ -4494) लिंबेजळगांवकडून मुरमीकडे जात होते. ही कार दहेगाव बंगल्याजवळ येताच चालकाचा कारवरील ताबा सुटल्याने कार चार पाच पलट्या खात थेट शेतात जाऊन उलटली. यात कारमधील चालकासह सर्व सहा जण जखमी झाले.

गणेश राऊत यांनी अपघाताची माहिती पोलिसांना देऊन जखमींना रुग्णालयात दाखल करण्यास मदत केली; मात्र जखमींपैकी विजय पारदे यांचे प्राण वाचू शकले नाहीत. जखमींवर औरंगाबाद येथील एका खासगी दवाखान्यात उपचार सुरू असून, शाकीर पटेल याची प्रकृती गंभीर असल्याचे पोलिसांनी सांगितले. या अपघाताची नोंद वाळूज पोलिस ठाण्यात करण्यात आली असून, पोलिस उपनिरीक्षक लक्ष्मण उंबरे पुढील तपास करीत आहे.