Paithan Sugar Factory: ऊसदरावरून स्वाभिमानी शेतकरी संघटना आक्रमक; पैठणमधील रेणुकादेवी साखर कारखाना बंद

विहामांडवा : श्री रेणुकादेवी शरद सहकारी साखर कारखाना, चौढाळा (ता. पैठण) येथे चालू गाळप हंगामातील ऊसदरावरून स्वाभिमानी शेतकरी संघटना व कारखाना प्रशासन यांच्यात संघर्ष निर्माण झाला आहे. ऊसाला प्रतिटन ३५०० रुपये पहिली उचल देण्याच्या मागणीसाठी स्वाभिमानी शेतकरी संघटनेने सोमवार, ता. २ नोव्हेंबर रोजी सकाळी ११ वाजता कारखाना परिसरात आंदोलन केले. यावेळी स्वाभिमानी शेतकरी संघटना व कारखाना प्रशासन यांच्यात ऊसदरासंदर्भात चर्चा झाली; मात्र ही चर्चा निष्फळ ठरली. त्यानंतर संघटनेच्या पदाधिकाऱ्यांनी गव्हाणीत जाऊन गाळप बंद करण्याची भूमिका घेतली. परिणामी कारखाना प्रशासनानेही कारखाना बंद करण्याचा निर्णय घेतला.