Parbhani : ‘विनाहेल्मेट’ कारवाईला आता व्यापक रूप ;परभणीत तिसऱ्या दिवशी ५४ जणांवर कारवाई

परभणी : शहरात हेल्मेट न घालता दुचाकीवर फिरणाऱ्यांवर उप प्रादेशिक परिवहन अधिकारी कार्यालयाकडून कारवाई करण्यात येत आहे. बुधवारी (ता. २८) कारवाईचा तिसरा दिवस असून, या दिवशी तब्बल ५४ वाहनधारकांवर कारवाई करण्यात आली. आता ही कारवाई व्यापक रुप घेणार असून, शहरासह तालुकास्तरावर देखील तपासणी मोहीम हाती घेतली जाणार आहे.

परभणी शहरात वाहतुकीला शिस्त नाही. वाहनधारक कुठे- कसे वाहन चालवितील, याची शाश्वती नाही. त्याच बरोबर कोणत्याही वाहतूक नियमांचे पालन न करता सुसाट दुचाकी पळविल्या जातात. यामुळे मोटारसायकल अपघातात अनेक बळी जात आहेत. त्यामुळे अपघातात परभणीचे नाव अधिक गडद होताना दिसत आहे.

वाढत्या अपघाताला आळा घालण्यासाठी उप प्रादेशिक परिवहन अधिकाऱ्यांच्यावतीने सातत्याने जनजागृती केली जाते. परंतु, आता लोकांना शिस्त लागावी व अपघातांचे प्रमाण कमी व्हावे, यासाठी थेट कारवाईचा बडगा उगारण्यात आला आहे. गेल्या तीन दिवसांपासून परभणी शहरात कारवाई सुरु आहे. सुरुवातील शासकीय कार्यालयांत हेल्मेट न घालता येणारे कर्मचारी व अभ्यंगतावर कारवाई केली जात आहे.

तिसऱ्या दिवशी तब्बल ५४ जणांवर कारवाई करण्यात आली. यात पोस्ट कार्यालयात २१, कृषी कार्यालयात १३ तर महापालिकेत २० वाहनधारकांवर कारवाई करण्यात आली आहे. त्याच बरोबर ९ अवैध अॅटोरिक्षांवर देखील कारवाईचा बडगा उगारण्यात आला आहे.