परभणी- मुदखेड दुहेरीकरणाने वाढणार रेल्वेंची गती

नांदेड : मुदखेड ते परभणी दरम्यान ८१. ४३ किलोमीटर दुहेरीकरणाचे काम पूर्णत्वास आले आहे. यातीलच लिंबगाव- चुडावा- पूर्णा- मिरखेल दरम्यान दुहेरीकरणाचे ३१. ९३ किलोमीटरचे ता. १४ फेब्रुवारी रोजी पूर्ण झाले. दक्षिण मध्य रेल्वेचे सुरक्षा आयुक्त राम कृपाल यांनी या नवीन मार्गावर पॅसेंजर गाड्या चालविण्यास परवानगी दिली. या नवीन मार्गावर ६० किलोमीटर प्रती घंटा या गतीने गाड्या चालविण्यास परवानगी देण्यात आली आहे. क्रमा- क्रमाने गाड्यांचा वेग वाढविण्यात येईल.
 
मुदखेड ते परभणी या ८१. ४३ किलोमीटर मार्गापैकी ५० किलोमीटरचे काम यापूर्वीच पूर्ण करण्यात आले होते. यातील परभणी ते मिरखेल या १७ किलोमीटरचे काम पूर्ण होवून ता. पाच जून २०१७ पासून यावर रेल्वे गाड्या धावत आहेत. दुसऱ्या टप्यात मुदखेड ते मूगट या ९. २६ किलोमीटर मार्गावर ता. नऊ आॅक्टोबर २०१८ पासून, तिसऱ्या टप्यात मालटेकडी ते लिंबगाव या १४. १६ किलोमीटर मार्गावर ता. १७ आॅक्टोबर २०१८ पासून तर चौथ्या टप्प्यात मुगट ते मालटेकडी दरम्यान १०. १७ किलोमीटर मार्गावर ता. २० सप्टेंबर २०१९ पासून रेल्वे गाड्या धावत आहेत.

हेही वाचा - थरार...! गुन्हेगार पुढे, पोलिस मागे...अन्.

मुदखेड ते परभणी दरम्यान तीन जंक्शन
 
मुदखेड ते परभणी हा पूर्ण ८१. ४३ किलोमीटर मार्ग पूर्ण करण्याकरिता ३९१ कोटी रुपये मंजूर करण्यात आले होते. मुदखेड ते परभणी दरम्यान तीन जंक्शन येतात. त्यामुळे या भागात रेल्वे गाड्यांची संख्या जास्त झाल्यामुळे काही गाड्यांना क्रोसिंगमुळे उशीर होत होता. दुहेरीकरणामुळे क्रोसिंगची समस्या सुटली आहे. आता मुदखेड ते परभणी दरम्यान रेल्वे गाड्यांना क्रोसिंगमुळे उशीर होणार नाही.

येथे क्लिक करा -  नागनाथ मंदिराला रथाच्या पाच प्रदक्षिणा

दमरेचे विभागीय व्यवस्थापक उपिंदर सिंघ यांचा पाठपुरावा

मिरखेल ते लिंबगाव या ३१ किलोमीटरचे काम करण्याकरिता नऊ दिवस लाईन ब्लॉक घेण्यात आला होता. या लाईन ब्लॉकमुळे बऱ्याच रेल्वे गाड्या रद्द, काही अंशतः रद्द, तर काही मार्ग बदलून धावल्या तसेच काही गाड्या उशिरा धावल्या. या कालावधीत नांदेड विभागातील जनतेने रेल्वे प्रशासनास सहकार्य केले या बद्दल दक्षिण मध्य रेल्वेचे विभागीय व्यवस्थापक उपिंदर सिंघ यांनी विभागातील जनतेचे आभार मानले आहेत.