परभणी : जायकवाडी वसाहतीमध्ये इसमाचा खून; सलग दुसऱ्या दिवशी दुसरी खुनाची घटना

परभणी ः शहरातील कारेगाव रस्त्यावरील जायकवाडी वसाहतीमध्ये एका 51 वर्षीय इसमाचा खुन झाल्याची घटना सोमवारी (ता.एक) उघडकीस आली. या इसमाचा मृतदेह परिसरात रक्ताच्या थारोळ्यात आढळून आला. या प्रकरणी नवामोंढा पोलिसांनी खुनाची नोंद  केली आहे.

शहरातील जायकवाडी वसाहत परिसरातील गोदावरी पाटबंधारे विकास मंडळ उपविभागीय अधिकारी शेतचारी अस्तरीकरण विभाग क्रमांक पाच या कार्यालयाजवळ ही खुनाची घटना घडली आहे. या संदर्भात पोलिसांनी दिलेल्या माहितीनुसार मयत इसमाचे नाव हे जयवंत वसंतराव पवार (वय 51) रा. श्रीराम नगर असे आहे. सोमवारी सकाळी जयवंत पवार यांचा मृतदेह जायकवाडी वसाहत परिसरात आढळून आला. घटनेची माहिती नवा मोंढा पोलिस ठाण्यात

देण्यात आली. घटनास्थळावर दारुच्या फुटलेल्या बाटल्या मिळाल्या आहेत. मयत जयवंत पवार यांच्या गळ्यावर गंभीर वार केलेले असल्याचे पोलिसांनी सांगितले. रविवारी, ता. 31 जानेवारी रोजी रात्री सदर इसमाचा खुन झाला असेल असा अंदाज व्यक्त करण्यात आला आहे. घटनास्थळास सहायक पोलिस अधिक्षक अबिनाश कुमार, पोलिस निरीक्षक रामेश्वर तट, सहायक पोलिस निरीक्षक आनंद बनसोडे, फौजदार रमेश गायकवाड, शैलेश जाधव, साईनाथ पुयड, अजयकुमार पाटील यांच्यासह इतर कर्मचाऱ्यांनी भेटी दिल्या.

दरम्यान, कालच ता. 31 जानेवारी रोजी लहान मुलांच्या भांडणातून एका इसमाचा खुन झाल्याची घटना शहरात घडली आहे. त्या घटनेला चोवीस तास उलटत नाहीत तोच दुसरा खुन झाल्याने नागरीकामध्ये भितीचे वातावरण पसरले आहे. जयवंत पवार यांच्या खुनाची नोंद नवामोंढा पोलिस ठाण्यात घेण्यात आली आहे.

घटनास्थळावर दारुच्या बाटल्या व खाद्य पदार्थ ज्या ठिकाणी जयवंत पवार यांचा खुन झाला त्या ठिकाणी दारुच्या बाटल्या व काही खाद्य पदार्थ पोलिसांना सापडले आहेत. यावरून या ठिकाणी जयवंत पवार यांच्यासह इतरांनी पार्टी केली असावी असा अंदाज पोलिसांनी व्यक्त केला आहे. त्यामुळे त्यांच्यासोबत रात्री कोण होते याचा शोध पोलिस घेत आहेत.

संपादन- प्रल्हाद कांबळे