परभणी : पुरातन बारव उपसली श्रमदानातून; रायपूर- ऐतिहासिक बारवाचे पुन्हा जतन

वालूर ( ता. सेलू, जिल्हा परभणी ) : सेलू तालुक्यातील रायपूर गावातील ग्रामस्थांनी एकत्रित येऊन श्रमदानातून जुनी पुरातन बारव उपसली. बारवाच्या जुन्या शिळांना व्यवस्थित लावत पुरातन ऐतिहासिक ठेव्यास पुनर्जीवन दिले. विशेष म्हणजे हे काम कोरोनामुळे लागलेल्या लॉकडाऊन काळात ग्रामस्थांनी केले. 

सेलू तालुक्यातील रायपूर येथे लॉकडाऊन दरम्यान सर्व गावातच आप आपल्या घरी होते. कोणीही बाहेर निघाले नाही. गावातील सप्ताह ही यावर्षी झाला नाही. त्यामुळे मिळालेल्या वेळेचा सदुपयोग व्हावा, या उद्देशाने गावातील ज्येष्ठ नागरिकांच्या मार्गदर्शनाखाली नागरिकांनी विशेतः युवकांनी गावात असलेला पुरातन बारव उपसण्याचे ठरवले. जुने लोक हा बारव खोल असल्याचे सांगत असल्याने याची नेमकी खोली किती, यात पाणी लागेल का, येथील जु्न्या शिळांचे काय झाले असे एक ना अनेक प्रश्न उपस्थित होत होते. या सर्व प्रश्नांची उत्तरे शोधण्यासाठी युवकांनी एकत्रित येत ग्रामस्थांच्या सहकार्याने बारव उपसण्याचा निर्णय घेतला. गावातील सर्वांनीच श्रमदानासाठी पुढाकार घेण्याचे ठरले. सर्वांनी एकत्रित येत कामास सुरवात गेली. जवळपास ४० ते ५० फुट खोल असलेली बारव उपसण्यात आली. यासाठी विहिर खोदण्यास लागणार्‍या क्रेनचेही सहाय्य घेण्यात आले. श्रमदानासाठी कोणीही माघार न घेता सर्व ग्रामस्थ एकत्रित प्रयत्न केल्याने बारव पूर्णतः उपसण्यात यश आले.

हेही वाचा -  ग्रामपंचायतनंतर नांदेड जिल्हा परिषदेची रणधुमाळी; बारड, पेठवडज आणि बोधडी येथे होणार पोटनिवडणूक

बारव उपसताना तेथे लावलेल्या शिळाही व्यवस्थित लावत हळूहळू बारव उपसण्याचे काम सुरु होते. फावल्या वेळेचा सदुपयोग म्हणून गावातील तरुणांनी हे कार्य स्वयंप्रेरणेतून केले. ग्रामस्थांनी घेतलेल्या पुढाकारामुळे आज घडीला बारवेत निथळ पाणी पहायला मिळू लागले आहे.
गावातील दादासाहेब गाडेकर, अंकूश गाडेकर, पांडुरंग सोळंके, लक्ष्मण गाडेकर, राजाभाऊ गाडेकर, हरिभाऊ, प्रल्हाद गाडेकर, जिजाभाऊ हिंगे, तातेराव गायकवाड, सर्जेराव गाडेकर, लक्ष्मण गाडेकर, पांडुरंग गाडेकर, दत्तराव गाडेकर, शरद गाडेकर, सचिन गाडेकर, माजी सरपंच गुलाब गाडेकर, संजय गाडेकर, पांडूरंग सोळंके, आबासाहेब गाडेकर यांच्यासह ग्रामस्थांनी यासाठी पुढाकार घेतला.

संपादन - प्रल्हाद कांबळे