Beed Crime News : दरोड्याच्या तयारीतील टोळी पोलिसांनी पकडली ; तिघे ताब्यात, चौघे फरारी; ट्रकही जप्त

बीड : पेट्रोल पंपावर दरोडा टाकण्यासाठी ट्रकमधून साहित्य घेऊन आलेल्या टोळीला स्थानिक गुन्हे शाखेच्या पथकाने जेरबंद केले. पाली (ता. बीड) परिसरात मंगळवारी सकाळी ही कारवाई करण्यात आली. ट्रक ताब्यात घेऊन तिघांना बीड ग्रामीण पोलिसांच्या स्वाधीन करण्यात आले. फरारी चार संशयितांचा शोध सुरु आहे.

पवन आश्रुबा कोळी (वय ४८, रा. पारा, ता. वाशी, जि. धाराशिव) याच्यासह दोन विधीसंघर्षग्रस्त मुलांचा पकडलेल्या संशयितांत समावेश आहे. सचिन आबाराम काळे ऊर्फ आबा रामा काळे (रा. बकरवाडी, ता. वाशी, जि. धाराशिव), मुरली देविदास ऊर्फ पिंट्या शिंदे, दत्ता गोवर्धन शिंदे, राघव ऊर्फ दगल्या आबा शिंदे ( सर्व रा. पारा, ता. वाशी, जि. धाराशिव) हे अट्टल दरोडेखोर आहेत.

दरोड्याच्या तयारीने ते ट्रकसह पाली शिवारात आल्याची माहिती बीड स्थानिक गुन्हे शाखेला मिळाली. त्यानुसार पवन कोळी, दोन विधिसंघर्षग्रस्त बालकांना ताब्यात घेण्यात आले. तर इतर संशयित फरारी झाले.