उदगीर (जि. लातूर) - लाचलुचपत प्रतिबंधक विभाग लातूर यांनी गुरुवारी (ता.२) केलेल्या सापळा कारवाईत दोन पोलिस अधिकाऱ्यांना रंगेहात पकडण्यात आले. या कारवाईमुळे उदगीर परिसरात खळबळ उडाली आहे..मिळालेल्या माहितीनुसार, पुणे येथील तक्रारदाराच्या मेव्हण्याविरुद्ध उदगीर ग्रामीण पोलिस ठाण्यात गुन्हा दाखल आहे. त्या गुन्ह्यात अटक टाळण्यासाठी आणि मदत करण्याच्या मोबदल्यात संबंधित पोलिस अधिकाऱ्यांकडून तब्बल तीन लाख रुपयांची लाच मागण्यात येत असल्याची तक्रार 1 एप्रिल रोजी लाचलुचपत विभागाकडे दाखल झाली होती..तक्रारीची पडताळणी गुरुवारी (ता.२) एप्रिल रोजी करण्यात आली. त्यावेळी पोलिस हवालदार राहुल बाबूराव नागरगोजे (पो. ठाणे उदगीर शहर) यांनी पोलिस निरीक्षक राजकुमार पुजारी (पो. ठाणे उदगीर ग्रामीण) यांच्या सांगण्यावरून पन्नास हजार रुपयांची लाच मागितल्याचे निष्पन्न झाले.यानंतर लाचलुचपत पथकाने सापळा रचला अहमदपूर रोडवरील हॉटेल पंचवटी येथे तक्रारदाराकडून ४५ हजार रुपये स्वीकारताना राहुल नागरगोजे यांना पंचांसमक्ष रंगेहात पकडण्यात आले. लाच स्वीकारल्यानंतर त्यांनी पोलिस निरीक्षक पुजारी यांना फोन करून माहिती दिली. त्यानंतर पुजारी यांनीही फोनवर “पाठवून द्या, मदत करता येईल” असे सांगून लाच मिळविण्याचा प्रयत्न केल्याचे उघड झाले..कारवाईदरम्यान आरोपी नागरगोजे यांच्या अंगझडतीत 45 हजार रुपये व मोबाईल हँडसेट जप्त करण्यात आला, तर पुजारी यांच्या अंगझडतीत मोबाईल मिळून आला आहे. दोन्ही आरोपींच्या घरांची झडती घेण्याची कार्यवाही सुरू असून, मोबाईल तपासणीही करण्यात येणार आहे..या प्रकरणी उदगीर ग्रामीण पोलिस ठाण्यात भ्रष्टाचार प्रतिबंधक कायदा अन्वये गुन्हा दाखल करण्याची प्रक्रिया सुरू आहे. दोन्ही आरोपींना ताब्यात घेण्यात आले आहे.हा सापळा व ही कारवाई पोलिस उपअधीक्षक संतोष बर्गे यांच्या मार्गदर्शनाखाली पार पडली असून, पुढील तपास पोलिस निरीक्षक विशाल बहात्तरे करीत आहेत. लाचखोरीविरोधात ही कारवाई महत्त्वाची मानली जात असून, पोलिस यंत्रणेत पारदर्शकतेचा संदेश देणारी ठरली आहे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
