औंढ्यात मटक्यावर पोलिसांची कारवाई 80 हजार रुपयांचा मुद्देमाल जप्त; सात आरोपी अटकेत

औंढा नागनाथ ( जिल्हा हिंगोली ) :  येथील जुने बसस्थानक परिसरात दुकानाला पंकज टेलर्स या नावाचा बोर्ड लावून मध्ये तितली भवरा व मिलन नावाचा मटका चालणाऱ्या सेंटरवर रविवारी ( ता. १४ ) दुपारी तीन वाजता पोलिस निरीक्षक वैजनाथ मुंडे यांच्या पथकाने धाड टाकून कारवाई करीत ७९ हजार सहाशे नव्वद रुपयांचा मुद्देमाल जप्त करुन सात जणावर गुन्हा दाखल करत त्यांना ताब्यात घेतले आहे. 

पोलिसांनी दिलेल्या माहितीनुसार येथील जुने बसस्थानक परिसरात पंकज टेलर्स या नावाचा दुकानाला बोर्ड लावून मध्ये तितली भवरा व मिलन मटका चालू असल्याची गुप्त माहिती मिळाल्याने पोलिस निरीक्षक वैजनाथ मुंडे यांनी पोलिस अधीक्षक राकेश कलासागर यांच्या मार्गदर्शनाखाली पथक तयार करुन सदरील तितली भवरा व मिलन मटक्यावर धाड टाकून मोठी कारवाई केली.

हेही वाचा - बहुतांशी व्यापाऱ्यांनी अतिक्रमण हटविले नसल्याने १२ फेब्रुवारीपासून सलग दोन दिवस ही मोहीम राबविण्यात आली

हे आहेत आरोपी

या कारवाईत सात आरोपींना ताब्यात घेण्यात आले. यामध्ये आरोपी अविनाश सुधाकर देशमुख, प्रभाकर लक्ष्‍मण डोने, रामदास देवराव चव्हाण, अंगद रामराव टोम्पे, शेख आतिक शेख बशीर, भगवान किसन आंभोरे, राजू नारायण पोपळघट यांना ताब्यात घेतले मात्र सेंटर मालक गोविंद टोम्पे हा पसार झाला. त्याला लवकरच ताब्यात घेणार असल्याचे पोलिस निरीक्षक वैजनाथ मुंडे यांनी सांगितले. दरम्यान याबाबत श्री. मुढे यांच्या फिर्यादीवरुन गुन्हा दाखल झाला आहे. या पथकात श्री मुंडे, हवालदार अफसर पठाण, खिजर पाशा, रवी इंगोले, धोंडबा दिघाडे, राजू सुर्वे, इक्बाल शेख, ओमकार रांजणेकर यांचा समावेश होता. या कारवाईने मटका चालविणाऱ्याना मोठा धक्का बसला आहे.

संपादन- प्रल्हाद कांबळे