सावधान ! आता दुचाकी जप्त होणार, विनाकारण फिरणाऱ्यांवर लातूर पोलिसांची कारवाई

लातूर  : संचारबंदी लागू असतानाही तुम्ही विनाकारण दुचाकी घेऊन रस्त्यावर फिरत असाल तर तुमची दुचाकी जप्त करण्याचा महत्त्वपूर्ण निर्णय पोलिसांनी घेतला आहे. या निर्णयाची अंमलबजावणी शहरात सोमवारपासून (ता.३०) लागू झाली आहे. त्यामुळे रस्त्यावरील गर्दी कमी होण्याची शक्यता वर्तवली जात आहे. अत्यावश्यक सेवा देणाऱ्यांना आणि अतिमहत्त्वाच्या कामांसाठीच बाहेर पडलेल्यांना या कारवाईतून वगळले जाणार आहे.

घराबाहेर पडू नका, असे वारंवार सांगूनही संचारबंदी पाहण्यासाठी तरूणाई मोठ्या प्रमाणात बाहेर पडताना दिसत आहे. विशेषत: सकाळी आणि संध्याकाळी रस्त्यावर वाहनांची गर्दी दिसत आहे. पोलिसांनी दंडूका उगारला तरी विनाकारण बाहेर फिरणारे अजूनही दिसू लागले आहेत. घराबाहेर पडू नका, असे आवाहन सर्व स्तरातून होत असले तरी तेही धुडकावून लावले जात आहे. त्यातच पोलिसांनी आपली काठी खाली टेकवली आहे. त्यामुळे बाहेर फिरण्यासाठी अनेकांना आणखीन बळ मिळाले आहे.

वाचा ः गावाकडे परतणाऱ्या पाहुण्यांसाठी आता `शिवार` क्वॉरंटाईन

पोलिसांनी अडवल्यानंतर भाजीचे किंवा किराणा सामानाचे कारण पुढे केले जात आहे. प्रत्येकाकडूनच ही कारणे पोलिसांनी ऐकावी लागत आहेत. काहीजण तर आपल्या लहान मुलांना बाहेर फिरायला घेऊन येत आहेत. त्यामुळे चिंतेचे वातावरण आणखी वाढत चालले आहे. रस्त्यावरील गर्दीत दिवसेंदिवस वाढ होताना दिसत आहे. या पार्श्वभूमीवर, पोलिसांनी विनाकारण फिरणाऱ्यांची दुचाकी जप्त करण्याचा निर्णय घेतला आहे, अशी माहिती अपर पोलिस अधीक्षक हिंमत जाधव यांनी ‘सकाळ’ला दिली. नागरिक रस्त्यावर येऊ नयेत म्हणून शहराच्या प्रत्येक भागात पोलिसांचे पथक तैनात करण्यात आले आहे. शंभर गृहरक्षकांचीही मदत घेण्यात आली आहे. विनाकरण बाहेर पडू नका, असे आवाहनही त्यांनी केले.

हेही वाचा ः लातुरात मंगळवारपासून किराणा दुकानातूनच भाजीपाल्याची विक्री

सातारा, कोल्हापूर, नाशिक, रत्नागिरी, कराड या शहरांमध्ये विनाकारण फिरणाऱ्यांच्या दुचाकी जप्त करण्याची कारवाई पोलिसांनी केली आहे. या शहरांत गेल्या पाच-सहा दिवसांपासून ही कारवाई सुरू असून आत्तापर्यंत अनेक दुचाकी पोलिसांनी जप्त केल्या आहेत, अशीच कारवाई आता लातूरात होणार आहे. त्यामुळे रस्त्यावरील दुचाकींची संख्या कमी होईल, असेही पोलिसांकडून सांगितले जात आहे.