Beed Crime News : कुंटणखान्यावर छापा ; आठ महिलांची सुटका

बीड : सहायक पोलिस अधीक्षक डॉ. धीरजकुमार बच्चू यांच्या पथकाने कुंटणखान्यावर छापा टाकून परराज्यातील आठ महिलांची सुटका केली. आंटीसह दोन ग्राहकांना पोलिसांना ताब्यात घेतले. ही कारवाई बीड शहरातील पांगरी रोडवरील शाहुनगर भागात मंगळवारी (ता. ३०) रात्री साडे आठ वाजेच्या सुमारास पोलिसांनी केली.

सोजरबाई होणाजी खंडागळे (वय ७०, रा. शाहुनगर, बीड) असे पकडलेल्या आंटीचे नाव आहे. सोजरबाई ही आपल्या राहत्या घरीच कुंटणखाना चालवत असल्याची माहिती पोलिसांना मिळाली. त्यावरून माजलगावचे सहायक पोलिस अधीक्षक डॉ. धीरजकुमार बच्चू यांनी सापळा लावला.

मंगळवारी रात्री पोलिसांनी दोन डमी ग्राहक पाठवून या कुंटणखाण्याचा पर्दाफाश केला. यामध्ये पश्चिम बंगाल, झारखंडसह मुंबईतील आठ महिलांची सुटका करत दोन ग्राहकांना अटक केली. त्यांना शिवाजीनगर पोलिसांच्या ताब्यात देण्यात आले आहे. शिवाजीनगर पोलिस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.

कारवाईत सहायक पोलिस अधीक्षक धीरजकुमार बच्चू, पोलिस निरीक्षक शीतलकुमार बल्लाळ, पोलिस उपनिरीक्षक के. बी. माकणे, हवालदार ए. ए. नामदास, ए. एस. देशमुख, पी. डी. ढगे, एस. बी. थापडे, के. एस. कानतोडे, गणेश नवले आदींनी सहभाग घेतला होता.