रेल्वेची मोठी दुर्घटना टळली; इंजिन पुढे, डबे पाठीमागे 

औरंगाबाद : अमृतसर नांदेड सचखंड एक्सप्रेसची कपलिंग अचानक तुटल्याने इंजिन पुढे निघून गेले तर डबे पाठीमागेच राहिले. दौलताबाद रेल्वे स्थानकाच्या पुढे निघाल्या नंतर ही घटना घडली. सुदैवाने काही अंतरावर डबे थांबले, त्यामुळे मोठा अनर्थ टळला. 

अमृतसरहुन नांदेडकडे जाणार्‍या सचखंड एक्सप्रेसने (शनिवार ता. 2) रोजी सकाळी सव्वा अकरा वाजेच्या सुमारास दौलताबाद रेल्वे स्टेशन सोडले. त्यानंतर काही क्षणात रेल्वेची कपलिंग तुटली. कपलिंग तुटल्यामुळे इंजिन भरधाव वेगात पुढे निघून गेले. तर डबे हळूहळू वेग कमी होत होत थांबले.

रेल्वे चालकाच्या लक्षात आल्यानंतर, पुन्हा इंजिन पाठीमागे आणून रेल्वेला जोडण्यात आले. विशेष म्हणजे इंजिन जोडून रेल्वे निघाल्या नंतर पुन्हा दुसऱ्यांदा शरणपूर जवळ कपलिंग तुटली. पुन्हा रेल्वे इंजिन पुढे निघून गेले व डब्बे पाठीमागे राहिले. कपलिंग जोडण्याचे काम सुरू करण्यात आले, त्यानंतर साडेबारा वाजता रेल्वे पुढील प्रवासासाठी रवाना झाली. रेल्वेची दोन वेळा कपलिंग तुटल्यामुळे जवळपास दीड ते दोन तास रेल्वे लेट झाली.