Walur : दुधना नदीपात्रावरील पुलाची उंची वाढवा

वालूर : वालूर-सेलू रस्त्यावरील राजेवाडी गावाजवळील दुधना नदीपात्रावर असलेल्या पुलाची उंची वाढवावी, अशी मागणी दबाव गटाने मुख्यमंत्री एकनाथ शिंदे यांच्याकडे निवेदनाद्वारे केली. निवेदनाचा आशय असा तालुक्यात लोकसंख्येने सर्वात मोठे तसेच उपबाजारपेठ असलेल्या वालूर परिसरातील जवळपास १५ ते २० गावांतील नागरिकांचा रोज संपर्क येतो.

वालूर-राजेवाडी-सेलू हा दळवळणाचा तालुक्यातील मुख्य रस्ता आहे. वालूरहून पुढे जिंतूर-परभणी रस्त्यावरील बोरी व जिंतूर-मंठा या राष्ट्रीय महामार्गावरील चारठाणा या मोठ्या गावांना जोडल्या जातो. वालूर परिसरात नुकतेच तुळजाभवानी या साखर कारखान्याचा प्रारंभ झाला आहे. सेलू-वालूर-पाचलेगाव-जिंतूर या रस्त्याचे मजबुतीकरण व डांबरीकरणाचे मोठे काम सुरू आहे.

सेलू-वालूरदरम्यान राजेवाडी गावाजवळील दुधना नदीपात्रावर कमी उंचीचा पूल असल्याने या पुलावरून नेहमीच पुराचे पाणी जात असल्यामुळे दोन-दोन, तीन-तीन दिवस वाहतूक ठप्प होत आहे. विशेषतः पावसाळ्यात नेहमीच या पुलावरून पुराचे पाणी तसेच लोअर दुधनाचे पाणी नदीपात्रात सोडण्यात येत असल्याने हा रस्ता बंद होत आहे.

त्यामुळे पुलाची उंची वाढवावी, अशी मागणी होत आहे. निवेदनावर ॲड. श्रीकांत वाईकर, ओमप्रकाश चव्हाळ, इसाक पटेल, ॲड. योगेश सूर्यवंशी, ॲड. देवराव दळवे, दिलीप मगर, सतीश काकडे, मुकुंद टेकाळे, लक्ष्मण प्रधान, रामचंद्र आघाव, रोफ भाई, रामचंद्र कांबळे, दत्तराव कांगणे, चंद्रकांत चौधरी, अजित मंडलिक, राजेंद्र केवारे, विजय मंत्री, ॲड. उमेश काष्टे, किरण डुघ्रेकर, दिलीप शेवाळे आदींच्या सह्या आहेत.