Hingoli : अतिवृष्टीग्रस्त शेतकऱ्यांसोबत साथ फाउंडेशनची दिवाळी

हिंगोली : येथील सेवासदन वसतिगृहात साथ फाउंडेशन संस्थेच्या वतीने यावर्षीची दिवाळी अतिवृष्टीग्रस्त, आत्महत्याग्रस्त शेतकरी कुटुंबासह सैनिक आणि दिव्यांग कुटुंबीयांसोबत शनिवारी साजरी करण्यात आली.

यावेळी जिल्हा पोलिस अधीक्षक राकेश कलासागर, डॉ. मनसा कलासागर, डीवायएसपी विवेकानंद वाखारे, एपीआय शिवसांब घेवारे, शिवाजी कऱ्हाळे, श्री. वाघमारे, धनराज कदम, मीरा कदम, सेवा सदनमधील मुले तसेच विविध कुटुंबातील महिला मोठ्या संख्येने उपस्थित होत्या. या कुटुंबातील महिलांना साडीचोळी तसेच फराळाचे वाटप करण्यात आले. साथ फाउंडेशनचे अध्यक्ष धनराज कदम आणि मीरा कदम हे मागील दहा वर्षांपासून असा उपक्रम राबवत आहेत.

ज्या घरामध्ये दिवाळी साजरी होत नाही त्या घरामध्ये दिवाळीनिमित्त आनंद देण्याचा हा त्यांचा छोटासा प्रयत्न सुरू असतो. या कार्यक्रमासाठी किशोर तळेकर, सृष्टी कयाल, डॉ. कंदी कैलास साबू, प्रफुल्ल बोराळकर, डॉ. मनोज साबू, प्रवीण महाजन, प्रभू आप्पा जिरवणकर, गोपाल सोमानी, भास्करराव मोरे, कैलास साबू, जितू जैन, जीवन काबरा, ज्योती वाघमारे, राजश्री क्षीरसागर आदींनी पुढाकार घेतला.