‘या’ जिल्ह्यात टंचाईवर पाण्यासारखा खर्च

नांदेड : जिल्ह्यात उन्हाळी टंचाईंतर्गत शहरी व ग्रामीण भागातील नागरिकांना पाणीपुरवठा करण्यासाठी यंदा ३५ कोटी ८७ लाख रुपयांचा खर्च झाला आहे. यात सर्वाधिक १३ कोटी ६७ लाख टॅंकर इंधनावर, आठ कोटी ७४ लाख विहीर अधिगृहणावर, तर सात कोटी ३३ लाख नळ योजनांच्या दुरुस्तीवर खर्च झाल्याची माहिती सूत्रांनी दिली.

ऑक्टोबर २०१८ ते सप्टेंबर २०१९ या कालावधीत जिल्ह्यात १५१ टॅंकरद्वारे पाणीपुरवठा करण्यात आला. तर एक हजार १२२ ठिकाणी विहीर व कूपनलिकांचे अधिगृहण करण्यात आले होते. या सोबतच नळ योजनांची विशेष दुरुस्ती, विधंन विहीर कार्यक्रम, तात्पुरती पूरक नळ योजना, नागरी तातडीची पाणीपुरवठा योजना, टॅंकर अधिगृहण, विहीर व कूपनलिका अधिगृहण तसेच लोहा नगरपालिकेसाठी टॅंकरद्वारे पाणीपुरवठा करणे आदी उपाययोजना राबविण्यात आल्या.

हेही वाचा - खडसेंनी केली प्रदेशाध्यक्षांसमोर भाजप-फडणवीसांची धो-धो धुलाई

आठ कोटी रुपये मिळणे बाकी

यासाठी ३५ कोटी ८७ लाख ४६ हजार रुपयांचा खर्च झाला आहे. यात ग्रामीण भागासाठी ३५ कोटी ३९ लाख ४७ हजार, तर नागरी भागासाठी ४७ लाख ९९ हजार रुपये खर्च झाला. या खर्चापैकी शासनाकडून ता. चार नोव्हेंबर रोजी २८ कोटी रुपये प्राप्त झाले असून, अद्याप आठ कोटी रुपये मिळणे बाकी असल्याची माहिती मिळाली.

मुखेडमध्ये सर्वाधिक टॅंकर
टंचाइ काळात सर्वाधिक मुखेड तालुक्याताय २७ गावे आणि ४२ वाड्यांवर ६० टँकरद्वारे पाणीपुरवठा करण्यात आला. त्यापाठोपाठ लोहा तालुक्यात २७ टँकरद्वारे १८ गावे आणि आठ वाड्यांवर, तर नांदेड तालुक्यात २० टँकरद्वारे १२ गावे आणि तीन वाड्यांवर, लोहा नगरपरिषदेच्या हद्दीतील ३० हजार लोकसंख्येला १२ टँकरद्वारे पाणीपुरवठा केला जात आहे. तसेच कंधार तालुक्यात दहा, माहूर तालुक्यात आठ, देगलूर तालुक्यात सहा, नायगाव आणि हदगाव तालुक्यात प्रत्येकी पाच टँकरद्वारे पाणीपुरवठा करण्यात आला. या सोबतच उमरी, भोकर आणि हिमायतनगर या तालुक्यांतही टँकरद्वारे पाणीपुरवठा करण्यात आला.

हेही वाचा - ‘या’ कायद्याचा असाही होतोय दुरुपयोग

टंचाईवर झालेला खर्च (लाखात)
योजना ---- खर्च
नळ योजनांची विशेष दुरुस्ती - ७३३.२५
विधंन विहीर कार्यक्रम - १४३.००
तात्पुरती पूरक नळ योजना(नागरी) - ४३४.२९
टॅंकर इंधन - १३६७.९०
विहीर अधिगृहण - ८७४.६९
लोहा पालिकेसाठी पाणीपुरवठा - ३४.३३
एकूण - ३५८७.४६