Jintur Accident : तीव्र उतारावरील खड्ड्याने घेतला दुचाकीस्वाराचा बळी

जिंतूर - तालुक्यातील शेवडी ते भोसी दरम्यान शेवडी शिवारातील डोंगराच्या तीव्र उतारावरील खड्डा चुकवण्याच्या नादात दहेगांवकडून येणाऱ्या दुचाकीस्वाराचा दुचाकीवरील ताबा सुटल्याने दुचाकी चक्क १५ ते २० 15 फूट खोल नाल्यात जाऊन आदळल्याने दुचाकीवरील ५०

वर्षीय वृद्धाचा मृत्य झाला तर दुसरा दुचाकीस्वार गंभीररित्या जखमी झाल्याची घटना गुरुवारी (ता.१७) दुपारी साडेबाराच्या सुमारास घडली.

शेवडी फाटा ते कुऱ्हाडी दरम्यान सार्वजनिक बांधकाम विभागातर्फे चालू असलेल्या रस्ता दुरुस्तीच्या कामामधून सुमारे साडेसात किमीच्या रस्त्याचे बीबीएम करण्यात आले आणि उर्वरित रस्ता तसाच सोडून देण्यात आल्यामुळे रस्त्यावर मोठमोठे खड्डे पडले आहेत.

शिवाय शेवडी फाटा ते भोसी दरम्यान असलेल्या शेवडी शिवारातील डोंगरावरील तीव्र उताराच्या सुरुवातीलाच मोठे खड्डे पडल्याने रस्त्यावरून ये जा करणाऱ्या वाहधरकांचे खड्ड्यामुळे छोटेमोठे अपघात होणे नित्याचे झाले आहे.

त्यातच गुरुवारी दहेगांव कडून जिंतूरकडे येणाऱ्या दुचाकी (क्रमांक एमएच २२ एआर ९५४९)वरील बोरी येथील ५० वर्षीय दुचाकी चालक गिरीश झंवर यांचा तीव्र उतारावरील खड्डा चुकवण्याच्या नादात दुचाकीवरील ताबा सुटल्याने दुचाकी चक्क रस्त्याच्या बाजूला असलेल्या १५ ते २० फूट खोल नाल्यात जाऊन जोरात आदळल्याने पाठीमागे बसलेले दहेगांव येथील ५० वर्षीय कैलास कोंडीबा ढोणे यांच्या डोक्याला गंभीर दुखापत झाल्याने ते रक्तबंबाळ अवस्थेत नाल्यात पडले होते.

परिसरातील नागरिकांनी त्यांना उपचाराकरिता तात्काळ जिंतूर येथील ग्रामीण रुग्णालयात दाखल केले मात्र वैद्यकीय अधिकाऱ्यांनी तपासणी केल्यानंतर त्यांना मृत घोषित केले. हा अपघात घडण्यापाठीमागे एकमेव तीव्र उतारावरील खड्डा जबाबदार आहे.

म्हणून आणखीन किती जीव जाण्याची वाट सार्वजनिक बांधकाम विभाग पाहत आहे असा खडा सवाल परिसरातील नागरिक करत आहेत. कारण मागील काही दिवसांपासून अनेक अपघात या खड्ड्यामुळे झाल्याने सदरील खड्डा मृत्यूचा सापळा झाला आहे हे सिद्ध झाले आहे.