परभणी जिल्ह्यातील ‘लोअर दुधना’ क्षेत्रात होणार सौरऊर्जा प्रकल्प 

सेलू ः परभणी जिल्हा आणि परिसरातील वीजटंचाई लक्षात घेऊन राज्य सरकारने सेलू तालुक्यातील लोअर दुधना प्रकल्पाची भिंत व धरण क्षेत्रामधील जागेवर सौरऊर्जा निर्मिती प्रकल्प उभारण्याचा निर्णय घेतला आहे. येत्या आठवड्याभरात तांत्रिक क्षमता तपासणीच्या कामाला सुरुवात होणार असल्याची माहिती ऊर्जामंत्री नितीन राऊत यांचे विशेष कार्य अधिकारी राहुल देशपांडे यांनी ‘सकाळ’ला दिली. 

जागा ऊर्जा विभागाकडे हस्तांतरित करण्याचे आदेश 
‘लोअर दुधना’क्षेत्रात सौरऊर्जा प्रकल्पाला मंत्र्यांनी सकारात्मक प्रतिसाद दिल्याने संबंधित जागा गोदावरी पाटबंधारे विकास महामंडळाकडून ऊर्जा विभागाकडे हस्तांतरित करण्याचे आदेश देण्यात आले आहेत. महानिर्मिती कंपनीद्वारे या प्रकल्पाची तांत्रिक क्षमता तपासण्याचे काम येत्या आठवड्याभरापासून सुरू होणार आहे. 

 
हेही वाचा - आर्ची म्हणाली मराठीत बोललेलं कळत नाही... गोरमाटीत बोलू....जय सेवालाल !

साठ मेगावॉट क्षमतेचा प्रकल्प 
‘लोअर दुधना’ क्षेत्रात सुमारे साठ मेगावॉट क्षमतेचा हा प्रकल्प असून, त्याची अंदाजे किंमत चारशे कोटी रुपये आहे. या प्रकल्पाद्वारे सुमारे अडीचशे ते तीनशे स्थानिकांना रोजगार मिळू शकणार आहे. राज्यात धरण क्षेत्रात उभारला जाणारा हा पहिला प्रकल्प असणार आहे. आगामी काळात राज्यातील इतर धरण क्षेत्रांची तांत्रिक योग्यता तपासून असे प्रकल्प उभारणी करण्यात येईल, असे ऊर्जा विभागाने नमूद केले आहे. ऊर्जामंत्र्यांच्या प्रयत्नाने हा प्रकल्प साकारला जाणार असल्याचे देशपांडे म्हणाले. 

हेही वाचा - कहरच ! राम मंदिर वर्गणीच्या मिरवणुकीत चक्क पीआय युनिफॉर्ममध्ये थिरकले; पाहा व्हिडिओ

अन्य प्रकल्पांसाठी पाठपुरावा 
टेक्सटाईल पार्क, औद्योगिक वसाहत, नवीन राष्ट्रीय महामार्ग, सेलू शहर भूमिगत गटार योजना आदी महत्त्वाकांक्षी प्रकल्पांसाठी पाठपुरावा सुरू असून लवकरच मान्यता मिळेल. नियामक मंडळाच्या बैठकीत हे विषय ठेवण्यात येणार असल्याचे राहुल देशपांडे यांनी सांगितले.  

संपादन ः राजन मंगरुळकर