काही खाजगी डॉक्टरांनी सहकार्याची भूमिका स्विकारली नाही, विभागीय आयुक्तांची खंत...

परभणी ः आपत्तीच्या काळात सर्वसामान्य नागरिकांना पूर्णतः दिलासा मिळावा या दृष्टीने खुलेआमपणे, व्यापक भूमिका घेवून आप-आपल्या वैद्यकीय सेवा पुरवाव्यात. जे-जे सहकार्य करता येईल त्यादृष्टीने प्रयत्न करावेत. कोरोनाविरुध्दच्या या लढाईत काही खाजगी डॉक्टरांनी अद्यापपर्यंत खुलेआमपणे सहकार्याची भूमिका स्विकारलेली नाही अशी खंत आयुक्त सुनील केंद्रेकर यांनी व्यक्त केली. खाजगी डॉक्टरांनी तत्काळ सहकार्याची भूमिका घ्यावी, असे आवाहन विभागीय आयुक्त सुनील केंद्रेकर यांनी मंगळवारी (ता.११) केले. 

परभणी जिल्ह्यातील कोरोना विषाणु संक्रमणाच्या पार्श्वभूमीवर विभागीय आयुक्त सुनील केंद्रेकर यांनी मंगळवारी (ता.११) जिल्हाधिकारी कार्यालयात अधिकारी व खासगी डॉक्टरांची आढावा बैठक घेतली. बैठकीस जिल्हाधिकारी दीपक मुगळीकर यांच्यासह पोलिस अधिक्षक कृष्णकांत उपाध्याय, जिल्हा परिषदेचे मुख्य कार्यकारी अधिकारी पृथ्वीराज बी.पी., निवास उपजिल्हाधिकारी स्वाती सूर्यवंशी, जिल्हा शल्यचिकित्सक डॉ. बाळासाहेब नागरगोजे यांच्यासह शहरातील खासगी डॉक्टरांची उपस्थिती होती. 

असहकार्याची, तटस्थपणाची भूमिका घेऊ नका 
परभणी जिल्ह्यात कोरोनाचे संक्रमण वाढत आहे. यामुळे जिल्ह्यातील आरोग्य यंत्रणा अधिक सक्षमपणे काम करणे गरजे आहे. कोरोनाविरुध्दच्या या लढाईत काही खाजगी डॉक्टरांनी अद्यापपर्यंत खुलेआमपणे सहकार्याची भूमिका स्विकारलेली नाही अशी खंत आयुक्त सुनील केंद्रेकर यांनी व्यक्त केली. खाजगी डॉक्टरांनी तत्काळ सहकार्याची भूमिका घ्यावी. त्या-त्या ठिकाणी सामान्य रुग्णालयासह आरोग्य विभागाबरोबर समन्वयातून काही जबाबदाऱ्या स्विकाराव्यात, असे आवाहन त्यांनी केले. आपत्तीच्या काळात असहकार्याची, तटस्थपणाची भूमिका घेऊ नका असे स्पष्टपणे बैठकीत बोलून दाखविले. आपत्तीच्या काळात सर्वसामान्य नागरिकांना पूर्णतः दिलासा मिळावा या दृष्टीने खुलेआमपणे, व्यापक भूमिका घेवून आपआपल्या वैद्यकीय सेवा पुरवाव्यात. जे जे सहकार्य करता येईल त्या दृष्टीने प्रयत्न करावेत. सरकारी यंत्रणेद्वारे कायद्यानुसार अनेक गोष्टी करता येवू शकतात, याचीही जाणिव ठेवावी, असेही केंद्रेकर यांनी म्हटले. 

हेही वाचा - मागील महिन्यात रुग्णालयास मंजुरी, या महिन्यात निधी, जागेचा प्रश्‍न कायम...

अधिकाऱ्यांची खरपट्टी 
जिल्हातील आरोग्य यंत्रणेतील काही बाबीची पुरेशी माहिती या बैठकीत आरोग्य विभागातील अधिकारी सादर करू शकले नाहीत. त्यामुळे यावर संतप्त झालेल्या आयुकांनी अश्या अधिकाऱ्यांची चांगलीच खरडपट्टी काढली. 

हेही वाचा - पाणी येणार आणि पुन्हा जाणार, शेतजमिनीच्या सिंचनाचा प्रश्न जशास तसा राहणार

आयुक्तांनी केली ऑक्सीजन प्लॅन्टच्या कामाची पाहणी 
जिल्हा शासकीय रुग्णालयात उभारण्यात येणाऱ्या ऑक्सीजन प्लॅन्टच्या कामाची पाहणी मंगळवारी आयुक्त सुनील केंद्रेकर यांनी केली. जिल्हाधिकारी दीपक मुगळीकर, जिल्हा परिषदेचे मुख्य कार्यकारी अधिकारी पृथ्वीराज बी.पी., जिल्हा शल्यचिकित्सक डॉ. बाळासाहेब नागरगोजे यांची या वेळी उपस्थिती होती. श्री.केंद्रेकर यांनी या ठिकाणी सुरु असलेल्या कामाची पाहणी करून कामाच्या प्रगतीची माहिती जाणून घेतली. या वेळी त्यांनी काही सूचना देखील केल्या. 

संपादन ः राजन मंगरुळकर