Orange : सोनाळ्याच्या संत्र्याला बाहेर राज्यातील बाजारपेठेत मिळतोय भाव

संग्रामपूर - तालुक्यातील सोनाळा येथील अभिता ऍग्रो इंडस्ट्रीजच्या संत्रा प्रक्रिया उद्योगाद्वारे आठ दिवसांत तब्बल १५ ट्रक संत्र्यांवर प्रक्रिया करण्यात आली. ब्रशिंग केल्यामुळे संत्र्याची चमक वाढली आहे. हैद्राबाद, केरळ, मुंबई, बंगळुरू येथील बाजारपेठेत संत्र्याला मागणी मिळत आहे. चांगला भाव मिळाल्याने संत्रा उत्पादक शेतकऱ्यांमध्ये आनंदाचे वातावरण आहे.

सोनाळा, गाव सातपुडा पर्वताच्या पायथ्याशी संत्रा बेल्ट म्हणून ओळखला जात आहे. या परिसरात मुबलक संत्रा उत्पादन घेतले जात आहे. मात्र आता पर्यत संत्र्यावर प्रक्रिया करणारा एकही उद्योग नव्हता. त्यामुळे संत्रा उत्पादक शेतकऱ्यांना नागपूर, अमरावती, मोर्शी असा लांबपल्ला गाठावा लागायचा.

या भागात संत्रा प्रक्रिया उद्योग सुरु झाला पाहिजे अशी येथील शेतकऱ्यांची बऱ्याच वर्षांपासूनची मागणी होती. नेमक्या या बाबीचा विचार करुन अभिता ऍग्रो इंडस्ट्रीजचे सीईओ सुनील शेळके यांनी १० मार्च रोजी सोनाळा येथे संत्रा प्रक्रिया उद्योग सुरु केला. त्यामुळे परिसरातील शेतकऱ्यांना मोठा लाभ होत आहे.

शेतकऱ्यांनी आणलेल्या संत्र्यावर विविध प्रकारची प्रक्रिया करण्यात येते. त्यानंतर पॅकिंग केलेला संत्रा देशातील नामांकित बाजारपेठेत पोहचवला जातो. अभिता ऍग्रो इंडस्ट्रीजने 'सोनाळा संत्री' या नावाने संत्र्याचा नवा ब्रँड तयार केला आहे. भविष्यात हा ब्रँड जागतिक बाजारपेठेत पोहचवण्यात येणार आहे. नामांकित विदेशी कंपन्यांसोबत अभिता ऍग्रो इंडस्ट्रीजचा करार झाला आहे.