Maratha Reservation : मराठा समाजाचे मागसलेपण तपासण्यासाठी सर्वेक्षण ; नागरिकांनी माहिती देण्यासाठी सहकार्य करावे : जिल्हाधिकारी पांचाळ यांचे आवाहन

जालना : राज्य मागासवर्ग आयोगामार्फत जिल्ह्यातील सर्व नोडल अधिकारी तथा तहसीलदार, नायब तहसीलदार व मास्टर ट्रेनर असे एकूण ४२ अधिकाऱ्यांचे मराठा समाज व खुल्या प्रवर्गाचे, सामाजिक व शैक्षणिक मागसलेपण तपासण्यासाठी करायच्या सर्वेक्षणाच्या कामकाजाबाबत शनिवारी (ता. २०) जिल्हाधिकारी कार्यालयात प्रशिक्षण घेण्यात आले.

ता.२३ जानेवारीपासून सुरू होणाऱ्या या सर्वेक्षणासाठी नागरिकांनी माहिती देण्याकरिता प्रगणकांना सहकार्य करावे, असे आवाहन जिल्हाधिकारी डॉ. श्रीकृष्ण पांचाळ यावेळी यांनी केले आहे. सर्वेक्षण हे गोखले इन्स्टिट्यूट या संस्थेकडून तयार करण्यात आलेल्या मोबाईल ॲप्लीकेशन प्रणालीच्या माध्यमातून करण्यात येणार आहे.

सर्वेक्षणासाठी तालुकास्तरावर तहसीलदार हे नोडल अधिकारी व नायब तहसीलदार यांना सहायक नोडल अधिकारी म्हणून नियुक्त करण्यात आले आहे. ता.२१ व ता. २२ जानेवारी तालुकास्तरावर प्रगणकांचे प्रशिक्षण आयोजित करण्यात आले आहे. हे सर्वेक्षण ता. ३१ जानेवारीपर्यंत पूर्ण करण्याच्या सूचना सर्व नोडल अधिकारी यांना यावेळी देण्यात आल्या.

तालुकानिहाय प्रगणक व पर्यवेक्षकांची आकडेवारी

• जालना- नियुक्त प्रगणकांची संख्या-२९२, नियुक्त पर्यवेक्षकांची संख्या-२१.

• अंबड- नियुक्त प्रगणकांची संख्या-३४५, नियुक्त पर्यवेक्षकांची संख्या-२३.

• भोकरदन- नियुक्त प्रगणकांची संख्या-६१३, नियुक्त पर्यवेक्षकांची संख्या-४१.

• जाफराबाद- नियुक्त प्रगणकांची संख्या-२७९, नियुक्त पर्यवेक्षकांची संख्या-१९.

• मंठा- नियुक्त प्रगणकांची संख्या-३३८, नियुक्त पर्यवेक्षकांची संख्या-२३.

• बदनापूर- नियुक्त प्रगणकांची संख्या-२६९, नियुक्त पर्यवेक्षकांची संख्या-१८.

• घनसावंगी- नियुक्त प्रगणकांची संख्या-४८३, नियुक्त पर्यवेक्षकांची संख्या-३२.