असे आहे साहित्य संमेलनाचे बोधचिन्ह

सकाळ वृत्तसेवा
गुरुवार, 7 नोव्हेंबर 2019

सोहळा यशस्वी करू : जिल्हाधिकारी दीपा मुधोळ-मुंढे 

उस्मानाबाद : उस्मानाबाद हा ऐतिहासिक वारसा लाभलेला जिल्हा आहे. सर्वांच्या सक्रिय सहभागातून येथे होणारे 93 वे अखिल भारतीय मराठी साहित्य संमेलन यशस्वी करू, अशी ग्वाही जिल्हाधिकारी दीपा मुधोळ-मुंढे यांनी दिली. 
येथे 10,11,12 जानेवारी 2020 ला हे संमेलन होत असून तयारी सुरु आहे. संमेलनाच्या बोधचिन्हाचे प्रकाशन गुरुवारी झाले. त्यावेळी मुधोळ-मुंढे बोलत होत्या. जिल्हा पोलिस अधीक्षक राजतिलक रोशन, जिल्हा परिषदेचे उपमुख्य कार्यकारी अधिकारी डॉ. संजय तुबाकले उपस्थित होते.

उस्मानाबादमध्ये होणारे संमेलन सर्वार्थाने वेगळे ठरणार आहे. जिल्ह्यातील पर्यटनस्थळे पाहण्याची संधी साहित्यिक, साहित्यप्रेमींना मिळणार आहे. त्यासाठी संयोजन समितीने आवश्‍यक ते नियोजन करावे. आवश्‍यक तेथे प्रशासनाचे सक्रिय योगदान मिळेल, असे मुधोळ-मुंढे म्हणाल्या.

ऐतिहासिक संदेश दिला गेल्याने संमेलनाचे बोधचिन्ह संस्मरणीय ठरणार आहे. संमेलनाच्या माध्यमातून जिल्ह्याचा ऐतिहासिक, सांस्कृतिक वारसा सर्वांसमोर येईल, असेही रोशन म्हणाले. 
स्वागताध्यक्ष नितीन तावडे यांनी संमेलन आयोजनाबाबत माहिती दिली. प्रमुख कार्यवाह रवींद्र केसकर यांनी केले. दौलत निपाणीकर यांनी सूत्रसंचालन केले. प्राचार्य डॉ. अनार साळुंखे यांनी आभार मानले. 
 
विजयकुमार यादव यांचा सन्मान 
संतश्रेष्ठ गोराकुंभार यांच्या पावन भूमीत संमेलन होत आहे. या पार्श्वभूमीवर संत गोराकुंभार यांच्या हाती चिपळ्या घेऊन भक्तिरसात तल्लीन झालेली प्रतिमा बोधचिन्हात साकारली आहे. "म्हणे गोरा कुंभार जीवनमुक्त होणे, जग हे करणे शहाणे बापा' ही संत गोराकुंभाररचित अभंगातील पंक्ती बोधचिन्हावर आहे. येथील विजयकुमार यादव यांनी साकारलेले हे बोधचिन्ह आयोजक समितीने निवडले आहे. मुधोळ-मुंढे यांच्या हस्ते त्यांचा सन्मान करण्यात आला. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Symbol of a All India Marathi Literature Conference