‘या’ कर्मचाऱ्यांनाही हवेय ५० लाखाचे विमा कवच, कोणाला ते वाचा...

नांदेड : ‘कोरोना’चा प्रादूर्भाव रोखण्यासाठी प्रयत्न करणारे डॉक्टर, पोलिस, ग्रामसेवक, मदतनीस, संगणक परिचालक, आशा वर्कर्स अशा विविध विभागात कार्यरत असणारे अधिकारी व कर्मचारी यांना ९० दिवसांकरीता ५० लाख रुपयाचे विमा संरक्षण दिले आहे. त्याच धर्तीवर बँकेतील कर्मचाऱ्यांना देखील कोरोना काळात ५० लाख रुपयांचे विमा सुरक्षा देण्यात यावी, अशी मागणी सहकारी बँक बहुजन कर्मचारी संघटना (महाराष्ट्र राज्य) यांनी निवेदनाद्वारे शासनाकडे केली आहे. 

बँक बहुजन कर्मचारी संघटनेचे प्रदेशाध्यक्ष भास्कर इंगळे शुक्रवारी (ता.१८) एप्रिल रोजी प्रसिद्ध केलेल्या निवेदनात त्यांनी ही मागणी केली आहे. संघटनेच्या वतीने प्रसिद्ध केलेल्या निवेदनात म्हटले आहे की, कोरोनाचा प्रादूर्भाव वाढत असताना आणि देशात लॉकडाउनची स्थिती असताना देखील बँक कर्मचारी शासनाच्या आदेशाप्रमाणे कर्तव्य पार पाडत आहेत. परंतु, ही सेवा देत असणाऱ्या कर्मचाऱ्यांच्या संपर्कात अनेक व्यक्ती येतात. त्यामुळे येणाऱ्या प्रत्येक व्यक्तीस कोरोनाची लागण आहे किंवा नाही हे ओळखणे शक्य नाही. 

हेही वाचा- Video : लॉकडाउनमध्ये कामगारांच्या हाताला काम दिल्यास पोटाचा प्रश्न सुटेल

आम्हाला कोरोना झाला तर कुटुंबियांचे काय?
संकट काळात देखील ग्राहकांना सेवा देत असलेल्या बँक कर्मचाऱ्यांची सुरक्षा काय असा सवाल कर्मचारी वर्गातून उपस्थित केला जात आहे. बँकेत येणाऱ्या ग्राहकांकडून देखील कोरोनाची लागण होण्याची शक्यता नाकारता येत नाही. तेव्हा बँकेत काम करणाऱ्या कर्मचाऱ्यांची सुरक्षा म्हणून त्यांनादेखील इतर कर्मचाऱ्यांप्रमाणे सुरक्षा कवच म्हणून ५० लाख रुपयांचे विमा संरक्षण दिले जावे, अशी मागणी बँक बहुजन कर्मचारी संघटनेचे प्रदेशाध्यक्ष भास्कर इंगळे, श्रीमती पद्मश्री गायकवाड, अभिषेक गुरावा यांनी केली आहे. भास्कर इंगळे यांनी केलेली मागणी रास्त असली तरी, त्यांच्या मागणीला शासन दरबारी कितपत यश येते हे बघणे गरजेचे आहे.