परभणी : मल्टीस्टेट को. ऑप. क्रेडिट सोसायटीच्या माध्यमातून ३६ लाखांचा अपहार करून ग्राहकांची फसवणूक करणाऱ्या श्री ढोकेश्वर मल्टीस्टेट को. ऑप. क्रेडिट सोसायटीच्या चेअरमनसह चौघांवर गुन्हे दाखल करण्यात आले आहेत. यातील तीन फरार आरोपींच्या परभणीच्या आर्थिक गुन्हे पथकाने मुसक्या आवळल्या.
प्रिंप्री देशमुख (ता. परभणी) येथील तक्रारदार चंद्रकांत आबासाहेब देशमुख (वय ३०) यांनी ता. आठ ऑगस्ट २०१८ रोजी श्री ढोकेश्वर मल्टीस्टेट को. ऑप. क्रेडिट सोसायटीचे चेअरमन व पदाधिकाऱ्यांनी मंत्री कॉप्लेक्स, वसमत रोड, परभणी व जिंतूर येथे सोसायटीच्या शाखा स्थापन करून ठेवीदारांना सोसायटीच्या विविध योजनांवर आकर्षक व्याजाचे व नोकरीचे आमिष दाखवून त्यांच्याकडून चालू खाते, बचत खाते, पिग्मी व ठेव स्वरूपात रोख रक्कम स्वीकारून जवळपास ३६ लाख रुपयांचा अपहार केला, अशी तक्रार नवामोंढा पोलिस ठाण्यात केली होती. त्यानंतर आरोपी सोसायटी बंद करून फरार झाले.
देशमुख यांच्या फिर्यादीवरून सतीश पोपटराव काळे (चेअरमन), अशोक शाहूराव राठोड (क्षेत्रीय अधिकारी), सुनील मधुकरराव मुळे (शाखाधिकारी), संतोष विश्वनाथ आडे (रोखपाल) यांच्या विरुद्ध नवामोंढा पोलिस ठाण्यात गुन्हा दाखल करण्यात आला आहे. या गुन्ह्याचा तपास आर्थिक गुन्हे शाखेमार्फत सुरू आहे.
हेही वाचा - ९४ लाखांचा अपहारप्रकरणी दुय्यम निबंधकास अटक
दीड वर्षापासून आरोपी फरार
या गुन्ह्यातील आरोपी मागील दीड वर्षापासून फरार होते. यातील आरोपी अशोक शाहूराव राठोड हा पुणे येथे असल्याची माहिती पोलिसांना मिळाली होती. पोलिसांनी त्यात ता. १४ जानेवारी रोजी पिंप्री चिंचवड (जि. पुणे) येथून ताब्यात घेतले. दुसरा आरोपी संतोष विश्वनाथ आडे यास तिगाव तांडा (ता. वडवणी, जि. बीड) येथून ता. १५ जानेवारी रोजी, तर तिसरा आरोपी सुनील मधुकरराव मुळे यास ता. २६ जानेवारी रोजी माजलगाव (जि. बीड) येथून ताब्यात घेतले. या प्रकरणाचा तपास सहायक पोलिस अधीक्षक नितीन बगाटे यांच्या नेतृत्वाखाली फौजदार गंगाप्रसाद दळवी, बाबासाहेब लोखंडे, पोलिस कर्मचारी बाबूराव घरजाळे, संजय वळसे, पंडित खरडे, अमोल वाडेकर, देवानंद भालेराव, सायबर सेलचे बालाजी रेड्डी, राजेश आगाशे यांनी केली.
चेअरमनसह तीघे न्यायालयीन कोठडीत
सोसायटीचा चेअरमन सतिश पोपटराव काळे, क्षेत्रीय अधिकारी अशोक राठोड व रोखपाल संतोष आडे हे तिघे न्यायालयीन कोठडीत आहेत. सुनील मुळे हा ता. ३० जानेवारीपर्यंत पोलिस कोठडी रिमांडमध्ये आहे. सतीश काळे यास नाशिक कारागृहातून हस्तांतरित करण्यात आले आहे. सतीश काळे याच्यावर इतर जिल्ह्यातही अशाच प्रकारचे १८ गुन्हे दाखल असल्याची माहिती सहायक फौजदार बाबासाहेब लोंखडे यांनी दिली.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.