दुर्दैवी! मायलेकीसह पुतणीचा नदीपात्रात बुडून मृत्यू

गेवराई (बीड): कपडे धुण्यासाठी आईसोबत गेलेल्या मुलीचा नदीकाठी खेळत असताना तोल गेल्याने तिला बाहेर काढण्यासाठी गेलेल्या आईचा व सोबत असलेल्या पुतणीचा नदीपात्रात बुडून मृत्यू झाला आहे. ही दुर्देवी घटना गेवराई तालुक्यातील मिरगाव येथे बुधवार सकाळी अकरा वाजण्याच्या सुमारास घडली. आईसह चिमुकल्यावर काळाने घाला घातल्याने परिसरात हळहळ व्यक्त होत आहे.

रंजना भागवत गोडबोले (वय 30), अर्चना भागवत गोडबोले (वय 10), शितल हनुमान गोडबोले (वय 11) अशी नदीपात्रात बुडून मृत्यू झालेल्यांची नावे आहेत. मिरगाव हे गोदावरी नदी काठी असलेले गाव आहे. दरम्यान रंजना गोडबोले ह्या नेहमीप्रमाणे बुधवार (ता.दोन) रोजी सकाळी कपडे धुण्यासाठी गोदापात्रात गेल्या होत्या. सोबत मुलगी व पुतणीही गेल्या होत्या. रंजना या धुणे धुण्यात व्यस्त असताना नदीकाठी खेळणारी मुलगी अचानक पाण्यात पडल्याने ती गोदापात्रात बुडू लागली.

यावेळी तिला वाचविण्यासाठी रंजना यांनी देखील गोदापात्रातील पाण्यात उडी मारली. दरम्यान गोदापात्रात धुणे धुणाऱ्या काही महिलांनी आरडा ओरड करत गावाकडे धाव घेऊन मदतीसाठी आवाहन केले. मात्र गावातील तरुण येईपर्यंत रंजना सह त्यांची मुलगी व पुतणीचा तीघीचा बुडून मृत्यु झाला. यानंतर या घटनेची माहिती मिळताच तलवाडा पोलीसानी घटनास्थळी धाव घेऊन घटनेचा पंचनामा केला. तसेच तिघीचे मृतदेह तलवाडा येथील प्राथमिक आरोग्य केंद्रात आणून शवविच्छेदन करण्यात आले. घटनेचा पुढील तपास तलवाडा पोलिस ठाण्याचे सहाय्यक पोलीस निरीक्षक प्रताप नवघरे करत आहेत.