अपघातात दोन गंभीर जखमी, कार पलटी; दुचाकी जळून खाक

भोकरदन (जालना) : भोकरदन हसनाबाद मुख्य रस्त्यावर रविवारी (ता.24) दुपारी एक वाजेच्या सुमारास दुचाकी व कारमध्ये झालेल्या अपघातात दोन जण गंभीर जखमी झाले.

अरुण अण्णा सोनोने (वय 29) व कोंडीबा भिमराव ठाले (वय 28) दोघे राहणार वाडी बुद्रुक ता. भोकरदन असे जखमींची नावे आहे. मिळालेल्या माहितीनुसार अरुण व कोंडीबा दोघे दुचाकीने हसनाबाद मार्गे औरंगाबाद येथे कामानिमित्त जात होते. त्यादरम्यान हसनाबादहुन भोकरदनकडे येणारी कार व त्यांच्या दुचाकीत कुंभारी पाटीजवळ सामोरा समोर जोराची धडक झाली. या अपघातात दुचाकीवरील दोघेही गंभीर जखमी झाले. त्यांच्यावर भोकरदन ग्रामीण रुग्णालयात प्राथमिक उपचार करून पुढील उपचारासाठी औरंगाबाद येथे हलविण्यात आल्याचे सांगण्यात आले.

कार पलटी : दुचाकी खाक..
दरम्यान अपघातानंतर कार रस्त्याच्या खाली जाऊन पलटी झाली तर दुचाकी आग लागल्याने दुचाकीचा पूर्णपणे कोळसा झाला. कारमधील कोणी जखमी आहे का याबाबत माहिती मिळू शकली नाही.