वाळूच्या ढिगाऱ्याखाली दबून दोन तरुणांचा मृत्यू

भोकरदन (जि. जालना) : नदीपात्रातील वाळू ट्रॅक्टरमध्ये भरत असतांना अचानक वाळूचे ढिगार कोसळल्याने ढिगाऱ्याखाली येऊन दोन तरुणांचा गुदमरून दुर्दैवी मृत्यू झाला. ही शनिवारी (ता. 23) रात्री साडेदहा वाजेच्या सुमारास तालुक्यातील गोकुळ शिवारात घडली. 

योगेश कोंडीबा तराळ (वय 18) व अनिकेत विक्रम तराळ (वय 17) दोघेही (रा. गोकुळ, ता. भोकरदन) अशी या घटनेत मृत झालेल्या तरुणांची नावे आहे. मिळालेल्या माहितीनुसार, योगेश व अनिकेत हे दोघे गावाजवळील केळणा नदी पात्रामध्ये रात्रीच्या वेळी वाळूचे ट्रॅक्टर भरत असतांना वाळूचा ढिगारा अचानक खचल्याने वरील दोन्ही तरुण या ढिगाऱ्याखाली दबल्या गेले. या घटनेनंतर येथे असलेल्या अन्य दोघांना ते दबल्याचे लक्षात आल्यानंतर त्यांनी गावाकडे धाव घेऊन ग्रामस्थांना बोलावले. ही बातमी गावात वाऱ्यासारखी पसरल्याने गावकऱ्यांनी नदी पात्राकडे धाव घेत त्यांचा शोध घेत त्यांना ढिगाऱ्याखालून काढून तत्काळ भोकरदन ग्रामीण रुग्णालयात आणले मात्र, येथे पोहचण्यापुर्वीच त्या दोघांचाही मृत्यू झाला होता. या घटनेने गावावर शोककळा पसरली असून, रविवारी सकाळी दोघांवरही एकाचवेळी शोकाकुल वातावरणात अंत्यसंस्कार करण्यात आले. 

दरम्यान या घटनेत मयत झालेला अनिकेतने नुकतीच दहावीची परीक्षा दिली होती तर योगेश हा अकरावीत शिकत होता. या कोवळ्या वयात त्यांचा असा दुर्दैवी मृत्यू ओढवल्याने सर्वत्र हळहळ व्यक्त करण्यात येत आहे.