दुचाकीची समोरासमोर धडक: २ युवकांचा जागीच मृत्यू तर ३ गंभीर

लोहारा (जि. उस्मानाबाद) : दोन दुचाकीची समोरासमोर जोराची धडक लागल्याने दोन युवकांचा जागेवर मृत्यू झाला. तर तीघेजण गंभीर जखमी झाले. ही घटना गुरूवारी (ता. सात) दुपारी साडेतीनच्या सुमारास लोहारा-पाटोदा मार्गावरील मार्डी गावाजवळ घडली. तालुक्यातील कानेगाव येथील मनमोहन उर्फ नाना सुभाष कदम (वय ३०), रविकांत ज्ञानदेव कदम (वय ३५) दोघे दुचाकीवरून मार्डीकडे जात होते. तर मार्डीहून लोहाऱ्याकडे धीरज महादेव आनंदगावकर (वय २६), नितिन व्यंकट कोळी (वय २६ दोघे रा. भातागळी), आकाश भोसले (वय २१ रा.मातोळा ता.औसा) तिघेजण दुचाकीवरून येत होते.

दरम्यान, मार्डीपासून एक किलोमीटर अंतराव दोन्ही दुचाकीची समोरासमोर जाोराची धडक झाली. यात नाना कदम, धीरज आनंदगावकर या दोघे जागीच ठार झाले. तर रविकांत कदम,नितिन कोळी, आकाश भोसले हे तीघेजण गंभीर जखमी झाले. जखमींना लोहारा ग्रामीण रूग्णालयात दाखल करण्यात आले. परंतु यातील दोघांची प्रकृती चिंताजनक असल्याने त्यांना उस्मानाबाद येथील शासकीय रूग्णालयात दाखल करण्यात आले. मार्डी येथे एकाची कंदुरीचा कार्यक्रम होता. कानेगावचे युवक कंदुरीचे जेवण करून परतत होते. तर भातागळीचे युवक कंदुरीच्या जेवणासाठी मार्डीकडे निघाले होते. दोन्ही दुचाकी भरधाव असल्याने भीषण अपघात झाला. दोन्ही दुचाकीची पुढील चाके तुटली होती. घटनेची माहिती मिळताच साहयक पोलिस निरीक्षक सुनीलकुमार काकडे, पोलिस हवलदार आनिल बोदमवाड, किशोर शेवाळे यांनी घटनास्थळी भेट देऊन घटनेचा पंचनामा केला.