दुर्दैवी घटना : लहान भावाला वाचविताना मोठ्या भावाचा पाण्यात बुडून मृत्यू : जिंतूर तालुक्यातील बेलखेडा येथील घटना

जिंतूर (जिल्हा परभणी) : तलावात पोहत असतांना लहान भाऊ पाण्यात बुडत असल्याचे पाहून त्याला वाचविण्यासाठी गेलेल्या मोठ्या भावाचा पाण्यात बुडून मृत्यू झाल्याची घटना बुधवारी (ता. ३१) दुपारी तीनच्या सुमारास बेलखेडा शिवारात घडली. सोनाजी उर्फ पप्पू एकनाथ सूर्यवंशी (वय १८) असे मृताचे नाव आहे.

सध्या तालुक्यात सर्वत्र संचारबंदी लागू असल्याने शाळा, महाविद्यालयांना सुट्टी आहे. त्यात चारपाच दिवसापासून तीव्र उन्हाचा कडाका सुरु असल्याने तालुक्यातील पाचलेगाव येथील अकरावीत शिकत असलेला सोनाजी त्याचा धाकटा भाऊ गजानन सूर्यवंशी व त्यांचा मित्र सिद्धार्थ सखाराम घुगे हे तिघे दुपारच्यावेळी बेलखेडा येथील तलावात पोहण्याकरिता गेले होते. पोहत असतांना गजानन बुडत असल्याचे पाहून त्याला वाचवण्यासाठी सोनाजीने त्याच्या दिशेने झेप घेतली. पाठोपाठ सिध्दार्थही गेला परंतु सोनाजी यास पाण्याचा अंदाज आला नसल्यामुळे तो स्वतः च पाण्यात बुडाला. परंतु सिद्धार्थ याने मित्राच्या भावाला सुखरुप पाण्याबाहेर काढले.

हेही वाचा - संचारबंदीमध्ये हातभट्टी दारु विक्रेत्यांना आले अच्छे दिन

घटनेची माहिती गावात वाऱ्यासारखी पसरली. त्यामुळे ग्रामस्थ व परिसरातील नागरिकांनी घटनास्थळी धाव घेऊन तलावात सोनाजीचा शोध घेतला. तब्बल दोन तासाच्या प्रयत्नानंतर त्याचा मृतदेह हाती लागला. सोनाजीचा मृतदेह जिंतूर येथील रुग्णालयात शवविच्छेदनाकरिता आणला. परंतु याबाबत दुसरे दिवशी (ता. एक)दुपारपर्यंत पोलिस ठाण्यात कोणी माहिती दिली नसल्याने पोलिसात घटनेची नोंद करण्यात आली नसल्याचे समजले.

संपादन- प्रल्हाद कांबळे