जायकवाडी कालव्याच्या दुरुस्तीसाठी निधीची तरतूद करु- जयंत पाटील

परभणी ः जायकवाडीच्या डाव्या कालव्याच्या दुरुस्तीसाठी निधीची तरतूद केली जाईल अशी ग्वाही जलसंपदा मंत्री जयंत पाटील यांनी परभणीतील शिष्टमंडळाला दिली. आमदार डॉ. राहूल पाटील यांच्या नेतृत्वाखाली शिवसेनेच्या शिष्टमंडळाने या संदर्भात श्री. पाटील यांची मंगळवारी (ता. आठ) भेट घेतली.

जायकवाडी प्रकल्पाचा डावा कालवा नादुरुस्त असल्यामुळे या कालव्यातून पाण्याचे वहन पुर्ण क्षमतेने होत नाही. त्यामुळे परभणी मतदारसंघातील 50 टक्के गावे ही पाण्यापासून वंचित राहू लागली आहेत. या कालव्यांची दुरुस्ती करण्यात यावी, अशी मागणी होत आहे. या संदर्भात आमदार डॉ. राहूल पाटील यांच्यासह शिवसेनेच्या शिष्टमंडळाने मंगळवारी जलसंपदा मंत्री जयंत पाटील यांची भेट घेत या प्रश्नाकडे त्यांचे लक्ष वेधले. त्यावर जलसंपदा मंत्री जयंत पाटील यांनी सकारात्मक प्रतिसाद देत हा प्रश्‍न तातडीने मार्गी लावण्यासाठी निधीची तरतूद करु, असे ठोस आश्‍वासन या शिष्टमंडळास दिले.

आमदार डॉ. राहूल पाटील यांच्यासह दिनेश बोबडे, रवि पतंगे देशमुख, प्रभाकर जैस्वाल, तानाजी भोसले, अनिल डहाळे, वसिक ईनामदार, बाळासाहेब रसाळ आदींचा शिष्ठमंडळात समावेश होता.

हेही वाचा - मुख्यमंत्री साहेब माझी जात कुठली; हिंगोलीच्या मराठा युवकाचे मुख्यमंत्र्याला निवेदन

जायकवाडी प्रकल्पाच्या डाव्या कालव्यावर परभणी जिल्ह्यातील 97 हजार हेक्टर लाभ क्षेत्र आहे. परंतू हा कालवा नादुरूस्त असल्यामुळे पाण्याचे वहन पुर्ण क्षमतेने होत नाही. विशेषतः किलोमीटर 122 येथे दोन हजार100 क्युसेस वहन क्षमता असताना फक्त 900 ते 1100 क्युसेस क्षमतेने पाण्याचे वहन होते. यात परभणी विधानसभा मतदारसंघातील 50 टक्के गावे ही कालव्याच्या टेल भागात आहे. त्यामुळे या भागातील शेतकर्‍यांना आवश्यक ते पाणी मिळत नाही. पैठणमधील कालव्याचे दुरुस्ती करण्याबाबत बैठक घेण्यात यावी, अशी आमची मागणी आहे.

- डॉ. राहूल पाटील, आमदार, परभणी

संपादन- प्रल्हाद कांबळे