हिंगोली जिल्ह्यातील आठवडे बाजारात शुकशुकाट

औंढा नागनाथ (जि. हिंगोली): कोरोनाच्या पार्श्वभूमीवर खबरदारीचा उपाय म्‍हणून जिल्‍हा प्रशासनाने आठवडे बाजार बंद ठेवण्याचे आदेश दिले आहेत. येथे गुरुवारी (ता.१९) भरणारा आठवडे बाजार बंद ठेवण्यात आल्याने बाजारात शुकशुकाट जाणवत होता. जिल्हाधिकारी रुचेश जयवंशी यांनी आठवडे बाजार बंद करण्याचे आदेश दिल्यानंतर गुरुवारचा आठवडे बाजार भरणार की नाही, याबाबत संभ्रमावस्था निर्माण झाली होती.

 परिसरातील चाळीस ते पन्नास गावांतील ग्राहक व विक्रेते आठवडे बाजारामध्ये येतात. सकाळी गावातील भाजीविक्रेते बाजारामध्ये आले होते. या विक्रेत्यांना पोलिस निरीक्षक वैजनाथ मुंडे, मुख्याधिकारी निशिकांत प्रचंडराव, नगराध्यक्षा विजयमाला मुळे, अविनाश गायकवाड, राम मुळे, अनिल नागरे, विष्णू रणखांबे, महादेव बळवंते, उत्तम जाधव, हरिहर गवळी, विजय महामुने यांनी कोरोनाबाबत जनजागृती केली. त्यानंतर ग्राहक व विक्रेत्यांना (ता.३१) पर्यंत औंढा नागनाथ येथील आठवडे बाजारमध्ये येऊ नये, असे नगर पंचायतीच्या वतीने आवाहन करण्यात आले. 

हेही वाचा - कोरोना व्हायरस: हिंगोलीत मंगल कार्यालय, लॉन, फंक्‍शन हॉल बंद

हट्टा येथे विक्रेत्यांची गैरसोय

हट्टा: वसमत तालुक्‍यातील हट्टा येथे दर गुरुवारी भरणारा आठवडे बाजार भरलाच नाही. या बाबत प्रशासनाने ग्रामपंचायत कार्यालयास बाजार बंद ठेवण्याबाबत सूचना दिल्या होत्या. कोरोनाच्या खबरदारीसाठी उपाय योजना करण्यात आल्या आहेत. कोरोना विषाणूचा संसर्ग होऊ नये, यासाठी खरदारी म्‍हणून प्रशासनाने गर्दीचे ठिकाणे बंद ठेवण्याचे आदेश दिले आहेत. त्‍याप्रमाणे हट्टा येथे भरणारा आठवडे बाजार बंदचे आदेश दिले होते. मात्र, येथे ग्रामीण भागातून येणाऱ्या भाजीपाला विक्रेत्यांना याची कल्‍पना मिळाली नसल्याने सकाळीच अनेक जण नेहमी प्रमाणे आले होते. त्‍यांना ग्रामपंचायत प्रशासन, पोलिस प्रशासनाने कोरोनामुळे बाजार बंद असल्याचे सांगितल्यानंतर विक्रेत्यांनी गावात फिरून पालेभाज्यांची विक्री केली.

बोल्‍डा आठवडे बाजार राहणार बंद

पोतरा: कळमनुरी तालुक्‍यातील बोल्‍डा येथे दर शुक्रवारी भरणारा आठवडे बाजार शुक्रवारी (ता. २०) बंद ठेवण्याच्या सूचना जिल्‍हा प्रशासनाने येहळेगाव ग्रामपंचायतला दिल्या आहेत. कोरोना विषाणूचा प्रसार रोखण्यासाठी गर्दी टाळावी, यासाठी जिल्‍हाधिकाऱ्यांनी या बाबत येहळेगाव गवळी ग्रामपंचायत कार्यालयास पत्र पाठविले आहे. त्यानुषंगाने बाजाराच्या ठिकाणी तसेच परिसरातील गावात याची माहिती देण्यात आली आहे. यामुळे शुक्रवारी बाजार भरणार नसल्याची माहिती येहळेगाव गवळीचे सरपंच शेख कौसर यांनी दिली. बोल्‍डा असोला, पोतरा, म्‍हैसगव्हाण, सिंदगी, पांगरा शिंदे आदी गावांसह विविध व्यापाऱ्यांना त्‍यांच्या मोबाइवर माहिती पाठविण्यात आली आहे. कोरोनाची खबरदारी म्‍हणून पुढील आदेश येईपर्यंत बाजार बंद राहणार असल्याचे शेख कौसर यांनी सांगितले.

येथे क्लिक करा- हिंगोलीत गॅस सिलेंडरचा स्‍फोट एक जण जखमी

जवळा बुद्रुकचा शुक्रवारचा आठवडे बाजार बंद

जवळा बुद्रुक : सेनगाव तालुक्‍यातील जवळा बुद्रुक येथे शुक्रवारी भरणारा आठवडे बाजार भरणार नसल्याचे ग्रामपंचायतर्फे माहिती दिली जात आहे. कोरोना विषाणूचा प्रसार रोखण्यासाठी बाजार बंद करण्यात येणार असल्याचे आदेश प्राप्त झाल्याने आठवडे बाजार बंद ठेवण्यात येणार असल्याची माहिती देण्यात आली आहे.