पंकजा मुंडेंच्या कारखान्यातील कामगार 18 महिने पगारीविना; कामगार संपावर
परळी वैजनाथ (बीड): तालुक्यातील पांगरी येथील वैद्यनाथ सहकारी साखर कारखान्याच्या कर्मचाऱ्यांनी मागील १८ महिन्यांपासून कारखान्याने पगार न दिल्याने बुधवारी (ता.१०) कारखाना बंद केला असून जोपर्यंत पगार नाही तोपर्यंत कारखाना सुरू करणार नसल्याची भूमिका कर्मचाऱ्यांनी घेतली आहे. या कारखान्याच्या विद्यमान अध्यक्षा भाजपच्या नेत्या पंकजा मुंडे आहेत.
पांगरी येथील वैद्यनाथ सहकारी साखर कारखान्याच्या कर्मचाऱ्यांनी दहा दिवसांपूर्वी कारखान्याचे कार्यकारी संचालक श्री. दिक्षतलू यांना निवेदन दिले होते. या कर्मचाऱ्यांना गेल्या १८ महिन्यांपासून पगार थकीत आहे. थकीत पगार १० दिवसांत आमच्या खात्यात वर्ग करा अन्यथा आम्ही कारखाना बंद करु असा इशारा देण्यात आला होता. दहा दिवस होऊनही पगार न झाल्याने कर्मचाऱ्यांनी बुधवारी सकाळ पासूनच कारखाना बंद केला असून यात वजन काटा व सर्व कार्यालयाचे कर्मचारी, उत्पादन युनिटचे कर्मचारी या संपात सहभागी झाले आहेत.
या संपाबदल कारखान्याच्या अध्यक्षा पंकजा मुंडे काय भूमिका घेणार याकडे लक्ष लागले आहे. कारण पंकजा मुंडे यांनी अनेक अडचणीतून हा कारखाना यंदा सुरू केला, ऊस उत्पादक शेतकऱ्यांना पहिला हप्ता मिळालाही होता. मात्र कर्मचाऱ्यांचे पगार मात्र थकीत आहेत. यामुळे कर्मचाऱ्यांनी हे संपाचे हत्यार उपसले आहे. दरम्यान वैद्यनाथ सहकारी साखर कारखाना भाजपचे दिवंगत नेते गोपीनाथ मुंडे यांनी अत्यंत मेहनतीने उभा केला. या कारखान्याने उत्पादनाचे अनेक विक्रम प्रस्थापित केले आहेत.
यामुळे हा कारखान्याचे नाव आशियाखंडात झाले होते. अशा कारखान्यासमोर गेल्या काही वर्षापासून अनेक अडचणी निर्माण झाल्या आहेत. या अगोदर दोन वर्षांपूर्वी कारखान्यातील कर्मचाऱ्यांनी पगारासाठी आंदोलन केले होते. त्यावेळी याची चर्चा राज्यभर झाली होती. यावेळी अनेक नाट्यमय घडामोडी घडल्या होत्या.कारखान्याच्या अध्यक्षा पंकजा मुंडे यांनी विरोधकावर शरसंधान केले होते. जिल्हा बँकेकडून कर्ज मिळवण्यासाठीही विरोधकांनी अनेक अडचणी निर्माण केल्या होत्या. पण पंकजा मुंडे यांनी यातून मार्ग काढत कारखाना सुरू केला. पण पुन्हा कर्मचाऱ्यांनी थकीत वेतनासाठी कारखाना बंद केला आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.