अंगणवाडीतील चार वर्षाच्या चिमुरडीवर तरूणाचा अत्याचार

लोहारा (जि. उस्मानाबाद) - लोहारा तालुक्यातील एका गावात चार वर्षाच्या मुलीवर एका अठरा वर्षाच्या तरूणाने अत्याचार केल्याची घटना सोमवारी (ता.१८) घडली. या प्रकरणी पोलिस ठाण्यात आरोपीविरोधात रात्री गुन्हा दाखल करण्यात आला आहे.

पोलिस सूत्रांकडून मिळालेल्या माहितीनुसार, तालुक्यातील एका गावातील चार वर्षाची मुलगी सोमवारी सकाळी नेहमीप्रमाणे अंगणवाडीत गेली होती. खाऊ खाण्याच्या मध्यल्या सुट्टीत तीच्या घरा शेजारी राहाणारा तरूण अंगणवाडीत आला. मुलीला चॉकलेट देतो म्हणून तीला एका पडक्यावड्यात घेऊन गेला. तीला चॉकलेट देऊन तिच्यावर अत्याचार केला.

मुलगी घरी आल्यानंतर तीने सर्व हकीकत तीच्या आईला सांगितली. जिथे अत्याचार केला तो पडका वाडा तीने आईला दाखवला. अत्याचाराची घटना कळताच उपविभागीय अधिकारी रमेश बरकते, सहायक पोलिस निरीक्ष सुरेश नरवडे, पोलिस उपनिरीक्ष अनंदराव वाठोरे महिला पोलिस उपनिरीक्ष अनुसया माने यांनी घटनास्थळाला भेट देऊन पाहणी केली. मुलीच्या आईने फिर्याद दिल्यावरून सोमवारी रात्री आरोपीविरोधात गुन्हा दाखल करण्यात आला आहे.